Italia do të jetë në gjendje të sjellë një ekip më shumë në edicionin e ardhshëm të UEFA Champions League. Turneu, siç dihet tashmë, do të revolucionarizojë formatin e tij në sezonin 2024-25 dhe do të ketë pjesëmarrjen e 36 skuadrave, me një grup të vetëm dhe tetë ndeshje (kundër po aq kundërshtarëve të ndryshëm) për çdo ekip.
Dy nga katër vendet shtesë, krahasuar me 32 aktuale, do t’u caktohen dy federatave që kanë marrë renditjen më të mirë të vendeve në sezonin 2023-24. Kjo do të thotë se falë performancave të nivelit të lartë të regjistruara në garat e klubeve të UEFA-s, skuadra e pestë në Serie A do të ketë të drejtën e hyrjes në Champions League.
Pas eliminimit të Inter-it, Napoli-t dhe Lazio-s në fazën e 1/16-tës së Champions League, shpresat për arritjen e objektivit u varën te Atalanta, Milan dhe Roma në Europa League dhe te Fiorentina në Conference League.
Rezultatet e arritura në ndeshjen e dytë çerekfinale, veçanërisht kalimi i Atalanta-s në raundin tjetër në ndeshjen kundër Liverpool-it, pas kualifikimeve për Fiorentina-n dhe Roma-n, ishin të mjaftueshme për të marrë vendin shtesë sezonin e ardhshëm.
Sipas renditjes së zyrtarizuar, gara për vendin tjetër është me Gjermaninë dhe Anglinë, me gjermanët përpara duke pasur parasysh se Premier League-s i ka mbetur vetëm një përfaqësues në garë, pikërisht Aston Villa në Conference League.
Ndërkohë, kjo është renditja e përditësuar, me Italinë që ruan vendin e parë dhe ka siguruar vendin shtesë në Champions League:
1.Itali – 19,429 pikë (një vend shtesë në Champions League)
2.Gjermani – 17,929 pikë (një vend shtesë në Champions League)
3.Anglia – 17.375 pikë
4.Franca – 16,083 pikë
5.Spanja – 15.313 pikë
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
