Zuckerberg dërgon në shtëpi 11 mijë punonjës të Meta-s

Meta Platforms ka njoftuar shkurtimin e 13 për qind të fuqisë punëtore, ose më shumë se 11 mijë punonjësve.

Kjo ka shënuar një nga pushimet më të mëdha nga puna të botës së teknologjisë këtë vit, me kompaninë që po lufton kundër rritjes së kostove dhe dobësisë së tregut të reklamave.

“Sot ndaj disa nga ndryshimet më të vështira që kemi miratuar në historinë e Meta-s. Kam vendosur të zvogëloj madhësinë e ekipit me rreth 13 për qind dhe të lë në shtëpi mbi 11 mijë punonjësit tanë të talentuar”, ka thënë Mark Zuckerberg.

Shefi ekzekutiv i kompanisë ka thënë gjithashtu se do të ndërmerren një sërë hapash të mëtejshëm për t’u bërë një kompani më efikase, duke ulur shpenzimet dhe duke zgjatur ngrirjen e punësimeve deri në tremujorin e parë.

Më herët, Zuckerberg u ka konfirmuar drejtuesve se kompania do të fillojë të pushojë nga puna anëtarë të stafit.

Ai iu drejtua qindra drejtuesve në kompani, duke paralajmëruar shkurtime të mëdha.

Shefi i Meta-s ka përmendur rekrutimin dhe ekipet e biznesit si grupe që do të shihnin pushime nga puna, duke shtuar se një njoftim i brendshëm i planeve të kompanisë pritet gjatë të mërkurës.

Zuckerberg ka thënë se ishte përgjegjës për rënien e kompanisë, me një mbioptimizëm rreth rritjes që çon në mbingarkesë.

Shefja e burimeve njerëzore të kompanisë, Lori Goler, ka treguar se punonjësit që humbasin punën do të pajisen me të paktën katër muaj pagë.

Në muajt e fundit, industria e teknologjisë ka vuajtur nga një ngadalësim i rëndë, pas një kulmi suksesi teksa bota u zhvendos në ambiente të mbyllura gjatë pandemisë.

Një rënie ekonomike globale, rritja e normave të interesit dhe betejat rregullatore kanë shtyrë kompanitë e teknologjisë të ngadalësojnë ose të ndalojnë punësimin.

Në fund të gushtit, Snap pushoi nga puna 1 mijë e 300 punonjës dhe shkurtoi investimet.

Microsoft-i pushoi nga puna rreth një mijë punonjës në disa divizione në tetor.

Twitter-i javën e kaluar pushoi gjysmën e fuqisë punëtore pas marrjes së kompanisë prej 44 miliardë dollarësh nga Elon Musk.

Meta sakaq është përballur me konfuzion për të ardhmen e kompanisë në muajt e fundit, pasi platforma e saj kryesore Facebook humbet përdoruesit e rinj dhe përballet me sfida të të ardhurave për shkak të ndryshimeve në politikat e privatësisë së Apple-it.

Ndërkohë, investitorët duken ende të pakënaqur nga strumbullari i kompanisë ndaj metaverse-it.

Rezultatet e tremujorit të tretë të Meta-s ishin të fundit në një seri raportesh zhgënjyese të të ardhurave. Humbi 230 miliardë dollarë në vlerën e tregut në shkurt në humbjen më të madhe njëditore në histori për një kompani amerikane.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.