Zgjedhjet në Kukës/ Celibashi falënderon të gjithë votuesit për vlerat e treguara

Në përfundim të procesit të numërimit të votave për zgjedhjet për kryetar të Bashkisë Kukës, kreu i Komisionit Qendror të Zgjedhjeve (KQZ), Ilirjan Celibashi, ka shprehur mirënjohjen dhe falënderime për votuesit dhe gjithë banorët e kësaj bashkie.

Sipas tij, ata edhe këtë radhë nuk zhgënjyen për vlerat civile që përfaqësojnë, vlera të cilat përcaktuan sjelljen e tyre në këtë proces.

Falënderim Celibashi ka shprehur edhe për anëtarët e KZAZ nr.11.

Kjo

për përkushtimin ndaj detyrës dhe profesionalizmin e treguar.

Në përfundim të procesit të numërimit të votave për zgjedhjet për kryetar të bashkisë Kukës, e palidhur fare me rezultatin përfundimtar të zgjedhjeve: pic.twitter.com/H2IPFH9eMQ

— Ilirjan Celibashi (@ICelibashi) September 25, 2023

“Falënderim dhe vlerësim për një numër jo të vogël vëzhguesish jo partiak të cilët i vëzhguan këto zgjedhje. Respekt dhe vlerësim për gjithë përfaqësuesit e medias të angazhuar me informimin e publikut për të gjitha aspektet e këtij procesi zgjedhor”.

Një vlerësim maksimal u dha për Policinë e Shtetit, veçanërisht për drejtuesit lokal të saj në këtë bashki për bashkëpunimin serioz e profesional me KQZ.

Zgjedhjet në Kukës

Ndërkaq, Partia Socialiste ka shpallur zyrtarisht fitoren në Bashkinë e Kukësit, ku me procesin tërësisht të përfunduar, ndryshimi është prej mbi 5 mijë votash.

Kështu, me 74 nga 74 kuti të numëruara, kandidati socialist Albert Halilaj ka arritur të marrë 13 mijë e 25 vota, përkthyer në 63.67%, krahasimisht me kandidatin opozitar të koalicionit Bashkë Fitojmë, Emri Vata, i cili ka marrë 7 mijë e 431 vota, ose 36.33% të totalit.

Me kutitë e mbetura është i pamundur kthimi i rezultatit.

Këtë fitore ndërkaq e kanë festuar socialistët e Kukësit, ku drejtuesi i majtë i qarkut, Pandeli Majko, ka mbajtur edhe një fjalë të shkurtër.

“Kjo është fitore e një djali që fiton në Kukës dhe që do tu shërbejë të gjithëve pa asnjë dallim partiak. I kemi një borxh të madh Kukësit. Ky borxh nuk shpërblehet me fjalë, por me vepra”, theksoi Majko pasi rezultati nuk mund të kthehet.

Nga ana tjetër, kryeministri i vendit, Edi Rama, e ka etiketuar fitoren e thellë si detyrim për të bërë më shumë vepra në bashkinë veriore.

“Kur janë numëruar pak më shumë se gjysma e kutive të votimit, kandidati i Partisë Socialiste për Bashkinë e Kukësit ka një avantazh të pakthyeshëm prej thuajse 3 mijë votash, i cili do të thellohet ende deri në kurorëzimin e një fitoreje shembullore, që flet qartë për besimin dhe për pritshmërinë e qytetarëve kuksianë ndaj nesh, si edhe për detyrimin tonë të madh ndaj tyre, për të bërë shumë më shumë akoma për Kukësin”.

Kështu ka shkruar kreu i PS-së në llogarinë e tij në Facebook.

Nëse bëhet krahasimi me zgjedhjet e 14 majit, kandidati i atëhershëm në Kukës për të djathtët, Admir Sinamati, arriti të merrte 9 mijë e 592 vota. Pra, mbi 2 mijë vota më shumë se sa Emri Vata sot.

Teksa, socialistët, atëherë me Safet Gjicin do të merrnin fitoren me 11 mijë e 632 vota. Por, sot, numrat e tyre janë konsoliduar edhe më shumë, me mbi 1 mijë e 300 vota plus në Kukës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.