Zelensky vlerëson rezistencën e popullit ukrainas: Miliona njerëz u bënë një e tërë

Në një fjalim drejtuar ukrainasve të dielën në mëngjes, Presidenti Volodymyr Zelensky vlerësoi format e shumta të rezistencës që njerëzit kanë zgjedhur për të kundërshtuar agresionin rus dhe e quajti vendin e tij “një superfuqi shpirtërore”.

Vendi, tha ai, po performonte në “maksimumin e mundësive”, me ushtarë që luftonin, por edhe njerëz të zakonshëm që mbronin qytetet, spitalet dhe repartet e zjarrit. Ai inkurajoi banorët e zonave të pushtuara të protestojnë, nëse është e mundur.

Dhjetë ditë pas luftës, tha ai, Ukraina ishte bashkuar me “miliona njerëz, të cilët u bënë një e tërë”.

Ndërkohë, “Associated Press” raportoi se ai u bëri një lutje “të dëshpëruar” ligjvënësve amerikanë dje që Shtetet e Bashkuara të ndihmojnë për të marrë më shumë avionë luftarakë në ushtrinë e tij.

Zelensky tregoi video-telefonatën private me ligjvënësit amerikanë duke u thënë atyre se kjo mund të jetë hera e fundit që ata e shohin atë gjallë.

“Presidenti Zelensky bëri një lutje të dëshpëruar”, tha udhëheqësi i shumicës në Senat, Chuck Schumer.

Ky i fundit shtoi se Zelensky dëshiron që SHBA-të të lehtësojnë transferimin e avionëve nga aleatët e Evropës Lindore. “Unë do të bëj gjithçka që mundem për të ndihmuar administratën për të lehtësuar transferimin e tyre”, tha Schumer.

SHBA-të po shqyrtojnë dërgimin e F-16 të prodhimit amerikan në vendet e ish-bllokut sovjetik në Evropën Lindore që tani janë anëtarë të NATO-s. Ata, nga ana tjetër, do t’i dërgojnë Ukrainës MiG-ët e tyre të epokës sovjetike, me të cilët pilotët ukrainas janë trajnuar për t’i fluturuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.