Zbulohet në Montreal i arratisuri shqiptar, i dënuar me burgim të përjetshëm

Një burrë që u dënua në mungesë në Shqipëri shumë vite më parë për vrasjen e një oficeri policie dhe djalit të tij tetë vjeçar u zbulua së fundmi duke jetuar në Montreal me një emër të rremë dhe doli para një gjyqtari në gjykatën e Montrealit të premten.

Qeveria shqiptare ka kërkuar ekstradimin e Ëngjëll Brahimit, 60 vjeç, një burrë që pretendohet se jeton prej vitesh në Kanada me emrin Piro Kota.

Sipas një deklarate të depozituar në kërkesën për ekstradim: “Më 21 maj 2001, kërkuesi u shpall fajtor në mungesë nga një gjykatë shqiptare për vrasje me paramendim për shkak të hakmarrjes, vrasje të kryer në rrethana të tjera specifike, tentativë vrasjeje dhe armëmbajtje pa leje.

“Dy nga viktimat mbetën të vrarë, njëri prej të cilëve fëmijë. Tjetri ishte ish-shefi i hetuesisë në qarkun e Fierit”.

Në janar, autoritetet në Shqipëri kërkuan që Brahimi të arrestohej dhe ai u kap më 26 janar.

Qeveria shqiptare pretendon se Brahimi vrau oficerin e policisë, Astrit Braçe, dhe djalin e tij tetë vjeçar, Asllan, në një pritë me armë zjarri më 10 gusht 2000.

Një deklaratë tjetër e depozituar në gjykatën e Montrealit jep më shumë detaje rreth asaj që fshihej pas pritës.

Në vitin 1997, vëllai i Brahimit, Iliriani, u vra në një shkëmbim zjarri me policinë pasi dikush kishte hapur zjarr ndaj një ambulance.

Braçe ishte një nga oficerët e policisë të pranishëm kur u vra vëllai i Brahimit dhe vëllai i Braçes ishte kreu i komisariatit lokal.

Dikush tentoi të qëllonte Braçen në vitin 1999, por nuk arriti. Brahimi ishte i dyshuar për të shtënat, por nuk kishte prova të mjaftueshme për ta akuzuar.

Më 10 gusht 2000, Braçe dhe gruaja e tij shkuan në plazh me djalin e tyre Asllanin, vajzën, mbesën dhe nipin.

Ata kanë qenë të gjithë në të njëjtin Mercedes-Benz teksa kanë dalë nga plazhi kur makina është goditur me armë zjarri në fshatin Poro-Pishë.

Brahimi dyshohet se ka dalë nga një Audi dhe ka hapur zjarr në drejtim të makinës tip Mercedes-Benz. Të paktën një person tjetër dyshohet se ka hapur zjarr nga ana e majtë e Benzit.

Deklarata përshkroi sesi Braçe arriti të dilte nga Benz dhe u nis drejt një lumi aty pranë. Gruaja e tij i mbijetoi pritës dhe vuri re se djali i saj ishte vrarë dhe nipi i saj ishte plagosur.

Gruaja e Braçes tha se më vonë dëgjoi të shtëna. Trupi i bashkëshortit të saj u gjet të nesërmen në buzë të lumit Vjosa.

Autoritetet në Shqipëri nuk mundën ta gjenin Brahimin pas të shtënave.

Deklarata përshkruan se si, më 6 prill 2001, ai dhe gruaja e tij, Elvira Brahimi, “u paraqitën para një gjykate greke në Athinë në lidhje me shkeljet e emigracionit dhe përdorimin e pasaportave false. Gjatë seancës dëgjimore, si kërkuesi ashtu edhe gruaja e tij pranuan identitetin e tyre real dhe dhanë detaje se si i kishin marrë dokumentet e falsifikuara”.

Autoritetet besojnë se Brahimi u largua nga Greqia dhe hyri në SHBA përpara se të kalonte në Kanada duke përdorur një pasaportë false.

Në vitin 2020, një burrë me të njëjtin emër si pseudonimi i Brahimit u intervistua nga Metro, një gazetë në Montreal.

Burri i identifikuar si Piro Kota i tha gazetës se po jepte mësime se si të drejtonte kamionë në lagjen St-Laurent.

Sipas dokumenteve të depozituara në kërkesën për ekstradim: “Në vitin 2018, Interpol Otava e këshilloi Shqipërinë se kishin arsye të dyshonin se zoti Brahimi jetonte në Montreal me një identitet të rremë të Piro Kotës”.

Kur Brahimi u arrestua nga QKMP në janar, “ai pranoi se në fakt është Ëngjëll Brahimi”.

Ai deklaroi se ishte në dijeni të akuzave kundër tij, se ai iku nga juridiksioni, se ai hyri në Shtetet e Bashkuara dhe më pas në Kanada me një emër të rremë, dhe përfundimisht mori nënshtetësinë nën këtë identitet të rremë.

Brahimi është planifikuar të ketë një seancë dëgjimore para Bordit të Emigracionit dhe Refugjatëve javën e ardhshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.