Zbardhet dosja e Prokurorisë – Vrasja e Xhuvanit mund të ishte parandaluar nëse policia do të kishte ndërhyrë në kohë

Albanian Post ka siguruar dosjen e Prokurorisë mbi vrasjen e Pjerin Xhuvanit dhe plagosjen e katër personave të tjerë në Elbasan, ndër ta edhe një punonjëse policie.

Ngjarja, e cila ndodhi më 21 prill, katër ditë para zgjedhjeve parlamentare të 25 prillit në Shqipëri, mund të ishte parandaluar, nëse policia do të kishte ndërhyrë në kohë.

Ky është konkluzioni në të cilën ka dalë Prokuroria e Elbasanit, pas më shumë se 14 muajsh hetime nga ngjarja që tronditi Elbasanin dhe më gjerë në vend.

Ditën e djeshme, Prokuroria e Rrethit Gjyqësor Elbasan dha urdhër, duke dërguar në arrest shtëpie dy ish-zëvendësdrejtorët e policisë së qarkut, Nikollaq Palla dhe Albert Nushi, si dhe pezulloi nga detyra gjashtë oficerë të Forcës së Posaçme “Shqiponja”.

Bazuar në dosjen e Prokurorisë dhe referuar dinamikës së ngjarjes, dy nëndrejtorët e policisë ishin të parët që mbërritën në vendin e ngjarjes, në lagjen “5 Maji”.

Ata u dërguan aty, pas një telefonate të bërë nga Arjan Hoxha, i prezantuar si përgjegjësi i sigurisë së shtabit elektoral të Partisë Demokratike (PD) në Elbasan.

Sapo mbërritën aty, zyrtarët e policisë po qëndronin në trotuar, duke dëgjuar Hoxhën.

Ky i fundit po u thoshte se, bashkë me kolegët e tij, kishin bllokuar një automjet pa targa, për të cilin dyshonin se drejtuesi i saj, shtetasi Mehmet Greca, po blinte vota në favor të Partisë Socialiste (PS).

Sipas Prokurorisë, paaftësia e Policisë për të ndërhyrë në kohë lejoi që, në ndihmë të Mehmet Grecës të vinin Pjerin Xhuvani, Klement Xhaferri, Gentian Sharra, Elton Bodinaku, Luan Tabaku, Mario Cela, Marsel Rroka etj., të cilët lëviznin me tre automjete.

Si rrjedhojë, palët u konfliktuan mes tyre dhe pati shkëmbim zjarri, ku mbeti i vrarë shtetasi Pjerin Xhuvani, ndërsa u plagosën katër të tjerë.

Për vrasjen e Xhuvanit rëndojnë akuza dhe ndodhet në burg ish-efektivi special i RENEA-s, Arbër Paplekaj, ndërsa dy personat që qëlluan në drejtim të tij nuk janë identifikuar ende.

“Nga ana e dy zv. drejtorëve, Albert Nushi, drejtor i Hetimit për Krimet, dhe Nikollaq Palla, drejtor i Hetimit për Rendin, dhe nga ana e trupës policore të Forcave të Posaçme Shqiponja nuk është vepruar fillimisht për të shoqëruar Mehmet Grecën dhe mjetin e tij”, thuhet në dosje.

“Moskryerja e këtij veprimi ka lejuar miqtë e Mehmet Grecës që të marrin territor dhe të dominonin në prani të Forcave të Policisë të shtetit”, vijon dosja.

Sipas Prokurorisë, zyrtarët e policisë mund të reagonin në përputhje me situatën, duke përdorur dhe armën e zjarrit, për të ruajtur jetën e qytetarëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.