Euro 2024

Xherdan Shaqiri futet në historinë e futbollit


Xherdan Shaqiri (Bradley Collyer/Imazhet e PA/Profimedia)

Me golin e tij në barazimin 1-1 të Zvicrës ndaj Skocisë në Euro 2024 të mërkurën në mbrëmje, futbollisti me origjinë shqiptare, Xherdan Shaqiri ka shkruar historinë në futbollin ndërkombëtarë.

Takimi i Grupit A mes Zvicrës dhe Skocisë nuk shkoi siç e kishin pritur zviceranët, të cilët në rast fitoreje do ta shihnin veten të kualifikuar përtej fazës së grupeve në Euro 2024.

Megjithatë, duket se takimi i fundit i zviceranëve përballë Gjermanisë do të flasë shumë për këtë grup, në të cilin Zvicra dhe Skocia luftojnë për vendin e dytë, me Hungarinë që nuk ka gjasa të shkojë më shumë se vendi i tretë.

Scott McTominay realizoi i pari, duke hapur rezultatin me golin e tij në minutën e 13-të. Por, vetëm 13 minuta pas golit të mesfushorit të Manchester United, Shaqiri realizoi një super gol duke hequr “rrjetën e merimangës”.

Nuk ishte thjesht një gol që do i jepte një pikë Zvicrës në fund, por edhe një gol që do të shkruante historinë.

Shaqiri, tashmë një legjend e Kombëtares zvicerane bëri historinë duke u bërë lojtari i parë që shënon në gjashtë garat e fundit të mëdha. Ai shënoi golin e tij të parë në Kupën e Botës në vitin 2014, dhe të njëjtën gjë e përsëriti në Euro 2016, Kupën e Botës 2018, Euro 2021 (2020), Kupën e Botës 2022 dhe tani në Euro 2024.

Të vetmit lojtarë që janë tani në Euro 2024 dhe që mund të përsërisin një sukses të tillë janë Cristiano Ronaldo dhe Ivan Perisic.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore