Wisner: Serbia t’ia jap dorën Perëndimit e t’i dorëzojë kriminelët serbë tek autoritetet e Kosovës

Frank Wisner, ish-përfaqësues special i Shteteve të Bashkuara të Amerikës (SHBA) për negociatat rreth statusit final të Kosovës, në një prononcim për rrjetin evropian të lajmeve në gjuhën shqipe “Euronews Albania”, ka bërë thirrje që Serbia t’i dorëzojë terroristët që sulmuan më 24 shtator Policinë e Kosovës në fshatin Banjskë të Zveçanit të banuar me serbë etnikë.

“Serbia duhet të ndërmarrë veprime në mënyrë të menjëhershme për t’i dhënë dorën Perëndimit dhe për t’i vendosur para drejtësisë serbe, ose t’i dërgojë drejtësisë kosovare kriminelët që morën pjesë në këtë sulm”, ka thënë Wisner, derisa ka shtuar se hapi i parë drejt zgjidhjes së kësaj situate është rikthimi i Kosovës dhe Serbisë në tavolinën e bisedimeve.

“Unë shpresoj që palët t’i kthehen tryezës së negociatave dhe është përgjegjësia e të dy palëve për të bërë diçka të tillë. Ekziston një rrugë për të ecur përpara, kjo është e theksuar te Marrëveshja e Ohrit (18 mars) dhe po ashtu kërkon zgjidhjen e problemit të Asociacionit të Komunave me shumicë serbe”, ka deklaruar diplomati amerikan në pension.

Kryeministri i Kosovës, Albin Kurti, të dielën shpërndau në llogarinë e tij zyrtare në platformën “X”, pamje të filmuara nga droni që, sipas tij, dëshmojnë se grupi terrorist që sulmoi Policinë e Kosovës, më 24 shtator, në hyrje të fshatit Banjskë të Zveçanit – komunë e banuar me shumicë serbe – ku u vra rreshteri Afrim Bunjaku është organizuar e mbështetur nga Serbia.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.