VV-ja dhe PDK-ja morën nga dy komuna, pjesëmarrja ishte e ulët, incidente nuk pati – Krejt çka ndodhi në zgjedhjet e jashtëzakonshme në Veri

Zgjedhjet e shumëpërfolura në Veri të Kosovës përfunduan. Procesi zgjedhor si zakonisht filloi në ora 7:00 dhe përfundoi në ora 19:00.

Gjatë këtyre zgjedhjeve nuk u raportua asnjë incident, dhe se gjithë procesi shkoi siç duhet u konfirmua nga Prokuroria dhe Policia e Kosovës.

“Policia e Kosovës deri në këtë fazë realizoi me sukses planin operativ për mbarëvajtjen e zgjedhjeve në katër komunat veriore të Kosovës, proces ky i cili në aspektin e sigurisë vlerësohet se ka kaluar i qetë dhe pa asnjë incident”, u tha në një njoftim për media.

Siç edhe pritej pjesëmarrja e qytetarëve në këto zgjedhje ishte tejet e ulët, kjo për shkak të bojkotimit të serbëve, e të cilët janë shumicë në këtë pjesë të Kosovës.

Vetëm 1567 qytetarë votuan në zgjedhjet e jashtëzakonshme në katër komunat veriore që janë mbajtur të dielën e 23 prillit, apo përkthyer në përqindje vetëm 3.47 për qind, nga gjithsejtë 45 mijë e 95 qytetarë sa kishin të drejtë vote.

Këtë të dhëna i bëri të ditura Kryetari i Komisionit Qendror Zgjedhor të Kosovës (KQZ), Kreshnik Radoiniqi, në një konferencë për media pasi u mbyllën të gjitha qendrat e votimit.

Në komunën e Leposaviqit morën pjesë 141 votues, apo 1.06 për qind, në Zubin Putok 385 votues, apo 5.78 për qind, në Zveçan 204, apo 2.92 për qind, dhe në komunën e Mitrovicës së Veriut 837 votues, apo 4. 62 për qind.

Kush fitoi në këto zgjedhje?

Fitorja ishte e barabartë në mes të Lëvizjes Vetëvendosje dhe Partisë Demokratike të Kosovës.

Mitrovica e Veriut dhe Leposaviqi janë dy komunat ku do të udhëheqin kandidatët e Vetëvendosjes.

Erden Atiq do jetë kryetar i Mitrovicës së Veriut, pasi ka marrë 519 vota apo 66.5 për qind, derisa pas tij është renditur ai i Partisë Demokratike të Kosovës, Taulant Kelmendi, me186 vota apo 23.8 për qind dhe Betim Osmani nga Iniciativa Qytetare Mitrovica me 75 vota apo 9.6 për qind.

Lulzim Hetimi i LV-së doli i pari në garën për kryetar. Ky i fundit numëroi 100 vota apo 73.5 për qind, ndërsa Albulena Behluli-Hetemi e PDK-së pati 34 vota apo 25 për qind. Ndërsa Aleksandër Jabllanoviç, edhe pse u tërhoq nga gara, mori dy vota.

E, Zveçani e Zubin Potoku janë dy komunat ku Partia Demokratike e Kosovës do ta ketë udhëheqjen.

Izmir Zeqiri, do të jetë kryetar i Zubin Potokut, pasi që arriti të dalë më i votuari me 196 vota apo 52.1 për qind, kurse Flatron Hasani nga LV-ja pati 180 vota apo 47.9 për qind.

Sipas KQZ-së, PDK-ja do ta ketë kryetarin e komunës edhe në Zveçan.

Ilir Peci mori 114 vota apo 60 për qind, ndërsa Fetah Peci i VV-së mori 71 vota apo 37.4 për qind. Sllagjana Pantoviç si kandidate e pavarur mori pesë vota apo 2.6 për qind.

Cilat ishin reagimet e ndërkombëtarëve?

Fillimisht, ambasada e Shteteve të Bashkuara të Amerikës përmes një reagimi për media bëri të ditur se zgjedhjet për kryetarë në katër komunat veriore të Kosovës janë mbajtur në përputhje me kërkesat kushtetuese dhe ligjore të Kosovës.

“Na vjen keq që jo të gjitha partitë shfrytëzuan të drejtën e tyre demokratike për të marrë në zgjedhjet e sotme. Pjesëmarrja në zgjedhje ndihmon për t’u siguruar që udhëheqësit janë përfaqësues të popullatës të cilës i shërbejnë. Votimi është një liri kritike e shoqërisë demokratike”, thuhej në reagim.

Ndërsa, ndryshe nga ShBA-ja, ambasadori i Francës në Kosovë, Olivier Guerot, u shpreh pas përfundimit të procesit zgjedhor në katër komunat në Veri të Kosovës se “këto zgjedhje me kaq pak votues nuk japin zgjidhje politike”.

Ambasadori francez përmes një postimi në rrjetin social Twitter tha se “na vjen keq për mungesën e pjesëmarrjes nga disa parti”.

Ndërkaq, si pika pozitive të këtyre zgjedhjeve, Guerot veçoi “profesionalizmin e policisë së Kosovës”, dhe po ashtu atë të “KFOR-it dhe EULEX-it”.

Kush reagoi në Kosovë?

Presidentja e Kosovës, Vjosa Osmani, kryeministri Albin Kurti dhe kryeparlamentari Glauk Konjufca, udhëheqësit e institucioneve kryesore në Kosovë pas përfundimit të procesit zgjedhor nuk e kanë thënë asnjë fjalë.

Por, për dallim nga ta, ministri i Punëve të Brendshme i Kosovës, Xhelal Sveçla, u shpreh i bindur se kryetarët e rinj të komunave në veri të Kosovës, nuk do të kenë probleme në punën e tyre, sepse, siç tha ai, “ligji do të zbatohet në të gjithë vendin”.

“Në veri vështirësitë janë më specifike, por probleme nuk do të ketë”, tha Sveçla për Radion Evropa e Lirë.

Ai theksoi se kryetarët e rinj “do të punojnë normalisht në objektet shtetërore të Kosovës”.

Nga opozita, kryetari i Partisë Demokratike të Kosovës, Memli Krasniqi, partia e të cilit fitoi dy nga katër komunat, pas përfundimit të procesit tha se “i uroj Ilirin (Peci) dhe Izmirin (Zeqiri) për fitoret, por edhe Albulenën e Taulantin për angazhimin dhe punën e palodhshme në komunat ku garuan. Ndërkaq, falënderimi më i madh u takon të gjithë atyre qytetarëve të cilët edhe sot i besuan PDK-së, kandidatëve dhe ofertës tonë”.

Ndër të tjera, Krasniqi potencoi se “tani presim nga Qeveria që të marrë obligimet dhe detyrat që i takojnë, për të zbatuar vullnetin qytetar dhe për të mundësuar konsolidimin e institucioneve në katër komunat e veriut”.

Çfarë u tha nga Serbia?

Partia më e madhe e serbëve në Kosovë, Lista Serbe, e cila dirigjohet drejtpërdrejtë nga Beogradi zyrtar nuk mori pjesë në këtë proces zgjedhor, dhe së bashku me presidentin e Serbisë, Aleksandër Vuçiç, shefin e të ashtuquajturës Zyrë për Kosovën në Qeverinë e Serbisë, Petar Petkoviç, dhe të gjitha institucionet e tjera serbe kanë bërë vazhdimisht thirrje serbëve që jetojnë në Kosovë, madje edhe kërcënimime që ta bojkotojnë tërë procesin zgjedhor.

Thirrjet dhe kërcënimet e tyre dhanë rezultat, serbët në Veri të Kosovës i bojkotuan masivisht këto zgjedhje.

Pas përfundimit të procesit, Petar Petkoviç, do të ishte i pari që do të reagonte.

Para se të jepeshin shifrat zyrtare nga Komisioni Qendror Zgjedhor, ai do të nxitonte që të tregonte numrin e vogël të qytetarëve pjesëmarrëse, e sidomos të atyre serbë.

“1 mijë e 566 shqiptarë dhe vetëm 13 persona të nacionalitetit serb, nga 45 mijë e 95 persona me të drejtë vote në këtë pjesë të Kosovës. I bie që vetëm 3.47 për qind e qytetarëve kanë marrë pjesë”, tha fillimisht ai.

“Kur e kombinojmë atë me zgjedhjet e vitit 2021, shihet se për Listën Serbe kanë votuar më shumë se 10.833 votues dhe në atë kohë kanë qenë 1.056 vota shqiptare. Tani në Mitrovicën e Veriut kanë votuar 832 persona të nacionalitetit shqiptar”, tha ai.

Pas tij, reagoi edhe “i forti i Veriut”, Milan Radojçiç, i cili është në listën e zezë të Shteteve të Bashkuara të Amerikës. Reagimi tij kishte tone kërcënuese.

Përmes një njoftimi zyrtar, ai tha se “atyre që mendojnë se me një apo dy për qind vota mund të udhëheqin komunat në veri, më duhet të them se populli serb kurrë nuk do t’i lejojë ta bëjnë atë gjë”.

“Në emër të Listës Serbe dhe emrin tim personal, dua të shpreh një falënderim të madh për bashkëvendësit e mi nga Leposaviqi, Zveçani, Mitrovica e Veriut dhe Zubin Potoku se kush e di sa herë është dëshmuar atdhedashuri, dinjitet, nder dhe unitet”, tha ai.

Ndërsa, kreu i Serbisë, Aleksandër Vuçiç, ende nuk ka reaguar pas përfundimit të procesit zgjedhor, mirëpo i njëjti ka bërë të ditur se një gjë të tillë do ta bëjë këtë të hëne, ku do t’i drejtohet popullit serb me një fjalim.

Si kishin ardhur këto zgjedhje?

Zgjedhjet për katër kryetarë komunash veriore të Kosovës dhe dy asamble komunale do të duhej të mbaheshin në dhjetor të vitit të kaluar, por ato u shtynë për 23 prill të këtij vit, pas kërkesës së ndërkombëtarëve që të mos vazhdohet tutje me procedura të rregullta, meqë situata në terren nuk e mundësonte.

Nevoja për zgjedhje lindi pasi në mënyrë të organizuar Lista Serbe, partia më e madhe e serbëve në Kosovë, tërhoqi kryetarët e komunave, deputetët, ministrat dhe gjithë stafin administrativ nga institucionet e Kosovës.

Largimi nga institucionet u bë si shenjë proteste për disa shkarkime që ndodhën në radhët e policisë, përfshirë komandantin serb të stacionit në veri, meqë ata nuk i përfillen urdhrat e dhëna me vendim qeveritar, për gjobitjen e të gjitha veturave me targa ilegale “KM”.

Më pas, kur qeveria u pajtua ta shtyjë zbatimin e vendimit, Lista Serbe u deklaruar se si kusht për t’u kthyer në institucionet kanë fillimin e themelimit të Asociacionit të Komunave me Shumicë Serbe.

Kosova është pajtuar që ta themelojë Asociacionin me Marrëveshjen për Rrugën Drejt Normalizimit të Raporteve me Serbinë, por Lista Serbe prapë refuzoi të regjistrohet në Komisionin Qendror Zgjedhor për t’u futur në listë të partive që garojnë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com