Lajme

Vulin për Krishtlindje në brezin kufitar me Kosovën: Jo provokime të armatosura


Ministri i Punëve të Brendshme të Serbisë, Aleksandar Vulin me pjestarët e MUP-it në breyin kufitar me Republikën e Kosovës, Merdarë

Ministri i Punëve të Brendshme të Serbisë, Aleksandar Vulin, festën e Krishtlindjeve ortodokse ka zgjedhur ta kaloj së bashku me policinë dhe xhandarmërinë të cilët sigurojnë brezin kufitar mes Serbisë dhe Republikës së Kosovës, duke kërkuar nga pjesëtarët e MUP-it të mos bëjnë “provokime të armatosura”.

Vulin ka thënë se “të gjithë janë të sigurt dhe të qetë”, njofton Ministria e Punëve të Brendshme serbe.

Ai ka thënë se policia është vigjilente në kryerjen e detyrave të saja pavarësisht që është ditë festive, duke shtuar se detyra më e rëndësishme e pjesëtarëve të policisë serbe është që gjithçka të jetë e qetë dhe e sigurt.

“Ndërsa të tjerët festojnë, pjesëtarët e MPB-së po punojnë dhe bëjnë çmos që festat t’i bëjnë të mira, dhe të sigurta”, theksoi ai.

Kurse ushtria serbe prej disa ditësh është duke kryer stërvitje në brezin kufitar me Kosovën, duke përdorur edhe artilerinë dhe mjetet e tjera të motorizuara.

Kështu bëhet e ditur në komunikatën e Ministrisë serbe të Mbrojtjes në të cilën thuhet se, “po mbahet me qëllim të ruajtjes dhe përmirësimit të gatishmërisë luftarake për kryerjen e detyrave të përkushtuara”.

“Stërvitja po kryhet në baza dhe objekte si pjesë e aktiviteteve të rregullta dhe paraqet vazhdimin dhe avancimin e stërvitjes që njësitet e Ushtrisë Serbe i realizojnë para se të dërgohen në Zonën e Sigurisë Tokësore me Kosovën”, thuhet në komunikatën e ministrisë serbe.

Pjesëtarët e ushtrisë së Serbisë gjatë zhvillimit të stërvitjes ushtarake pranë brezit kufitar me Kosovën.

/Albanianpost.com


Lajmet kryesore