Vuçiçi uron autokratin e Venezuelës për rezultatin zgjedhor, falënderon Maduron për mosnjohjen e Kosovës

Presidenti i Serbisë, Aleksandër Vuçiç, ka uruar liderin autoritar të Venezuelës, Nicolás Maduro, për fitoren e zgjedhjeve të kontestuare presidenciale të së dielës, duke thënë se Serbia respekton këtë shtet në Amerikën Jugore për shkak të qëndrimit armiqësor kundër Kosovës.

“Serbia e vlerëson shumë që Venezuela tregon respekt për parimet dhe drejtat e qytetarëve, kartën e Organizatës së Kombeve të Bashkuara (OKB), rezolutën 12 44 të Këshillit të Sigurimit të OKB-së, integritetin territorial dhe sovranitetin e Republikës së Serbisë”, ka deklaruar Vuçiçi në një deklaratë.

Maduro i ka fituar 51 për qind të votave në zgjedhje, në bazë të rezultateve zyrtare, pavarësisht se sondazhet kanë parashikuar fitore të opozitës. Shtetet e Bashkuara të Amerikës (SHBA) kanë ngritur dyshime serioze që rezultatet e publikuara prej autoritetit zgjedhor nuk reflektojnë votat e popullit.

Në këmbim të mbështetjes ndërkombëtare rreth Kosovës, shteti serb përkrah të gjitha autokracitë botërore që nuk e njohin pavarësinë e vendit të vogël. Serbia, përgjatë gjithë historisë, ka marshuar sipas një daulleje krejt të ndryshme nga bashkësia e organizuar perëndimore, posaçërisht sa i përket deklaratave, rezolutave dhe sanksioneve kundër regjimeve jodemokratike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.