Vuçiç paralajmëron sërish “ditë të vështira” për Serbinë, përmend anëtarësimin e Kosovës në Këshill të Evropës
![](https://albanianpost.com/wp-content/uploads/2023/02/Aleksander.jpg)
Presidenti i Serbisë, Aleksandër Vuçiç, derisa paralajmëroi sërish “ditë të vështira” për Serbinë, deklaroi se anëtarësimi eventual i Kosovës në Këshill të Evropës nënkupton largimin e Serbisë nga kjo organizatë, duke pretenduar se Kosova ende nuk i ka plotësuar kushtetet për anëtarësim, posaçërisht rreth themelimit të Asociacionit të Komunave me Shumicë Serbe.
Ai e cilësoi “periudhë të vështirë” vendimmarrjen në Këshillin e Evropës për pranimin e Kosovës dhe draft-rezolutën e Kombeve të Bashkuara (OKB) për gjenocidin serb në Srebrenicë të Bosnje-Hercegovinës, derisa njoftoi t’i ketë dërguar një ankesë Asamblesë së Përgjithshme të OKB-së për shkeljen e pretenduar të procedurave mbi rezolutën për dënim të gjenocidit.
Vuçiç komentoi edhe deklaratën e shteteve të QUINT-it pas paralajmërimit të Listës Serbe se do ta bojkotojnë votimin e 21 prillit në veri të Kosovës, duke i quajtur “gënjeshtarë e të pafytyrë” ambasadorët e Shteteve të Bashkuara (SHBA), Gjermanisë, Britanisë së Madhe, Francës e Italisë, posaçërisht për shkak të thirrjes që Lista Serbe ta rishqyrtojë vendimin për bojkot.
Serbia ka paralajmëruar se do të angazhohet kundër anëtarësimit të Kosovës në Këshillin e Evropës dhe kundër aprovimit të rezolutës së OKB-së për gjenocidin në Srebrenicë. Përderisa votimi për Kosovën pritet ta kalojë fazën parafinale më 16 prill në Asamblenë Parlamentare të Këshillit të Evropës, data kur do të votohet draft-rezoluta e OKB-së nuk është e caktuar ende.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Mexhiti: Po punojmë çdo ditë që ish ushtari i UÇK-së të lirohet
-
LDK-ja pranon ftesën e Osmanit për diskutimin e datës së zgjedhjeve
-
Elshani për garën e kërcimit në Ujman: Për ne është detyrë, dikush mund ta shoh si provokim
-
KFOR: Kemi patrullime të rregullta në kufirin me Serbinë për siguri dhe stabilitet