Presidenti i Serbisë, Aleksandar Vuçiç, ka deklaruar se ndërkohë në Kosovë flitet për luftë, në Serbi flitet vetëm për zhvillim.

“Unë kam folur gjatë gjithë kohës për zhvillimin e Serbisë, si duhet të ndryshojmë”, ka deklaruar ai.

Duke folur për procesin e dialogut, Vuçiç pretendoj se është pala kosovare ajo që po refuzon këtë proces.

“Besoj se rrethanat do të ndryshojnë në të ardhmen dhe se dikush do të kuptojë se të gjithë përfitojnë nga dialogu dhe zgjidhjet e kompromisit. Zgjidhja e gjërave me kërcënime, spastrim etnik i serbëve, në radhë të parë nga Veriu i Kosovës, nuk është politikë serioze dhe nuk do të sjellin rezultate”, pretendoi ai.

I pyetur për protestat e shqiptarëve në Luginë të Preshevës, Vuçiç tha se autoritetet serbe po i dëgjojnë me vëmendje kërkesat e të gjithë qytetarëve të Preshevës e Bujanocit.

Ai ndër të tjera ka pretenduar se protestat në Luginë të Preshevës kanë të bëjnë me faktin se “pushtetin e kanë humbur forcat që janë pro Albin Kurtit”.

“Në vendin tonë, ndryshe nga situata në Prishtinë, lejohen demonstratat. Ne nuk kemi problem kur demonstrojnë shqiptarët, ne dëgjojmë me kujdes të gjitha vërejtjet e tyre”, pretendoi ai.