Vuçiç kundërshton deklaratën e Hovenier’it se Asociacioni duhet të formohet në përputhje me Kushtetutën e Kosovës

Presidenti i Serbisë, Aleksandër Vuçiç, e ka kundërshtuar deklaratën e ambasadorit të Shteteve të Bashkuara të Amerikës në Kosovë, Jeff Hovenier, i cili tha se Asociacioni i Komunave me Shumicë Serbe duhet të formohet në përputhje me Kushtetutën e Kosovës.

Në një prononcim për televizion publik serb nga Parisi, ku po merr pjesë në Forumin e Paqes, duke iu përgjigjur deklaratës së ambasadorit amerikan, Vuçiç fillimisht ka pyetur se pse Beogradi zyrtar negocioi dhe po negocion në Bruksel për këtë çështje.

“Nëse diçka është në përputhje me Kushtetutën e Kosovës, çfarë kemi negociuar në Bruksel, çfarë është negociuar, çfarë kemi nënshkruar? Kjo do të thotë se serbët mund ta vendosin edhe sot nëse është në përputhje me Kushtetutën e Kosovës dhe askush nuk mund t’ua ndalojë”, pretendoi Vuçiç.

Në një konferencë për media të enjten, Hovenier tha se drafti i Asociacionit “është konsideruar nga ne që respekton plotësisht Kushtetutën e Kosovës”.

“Pozita jonë është që Asociacioni duhet të jetë brenda kushtetutshmërisë së Kosovës, duhet të jetë në përputhje me vendimin e Gjykatës Kushtetues, nuk duhet të ketë autoritet ekzekutiv. Nuk do të jetë shtresë e re e qeverisjes”, pohoi Hovenier.

Në përgjigje të kësaj deklarate, kreu i Serbisë përdori një thënie të vjetër serbe: “Çfarëdo që i pëlqen gjyshes, atë ëndërron”, duke tentuar kështu që të ironizoi me diplomatin amerikan.

Çka tha Hovenier?

Të enjten Hovenier, e thirri një konferencë të shpejtë para dyerve të ambasadës dhe i ftoi gazetarët të bëjnë pyetje.

Ai lëvdoi Kryeministrin e Kosovës, Albin Kurti, që e ka kuptuar emergjencën që kërkon momenti dhe tregoi se si Albin Kurti i ka pranuar marrëveshjet në tërësinë e tyre, përfshirë draftin e Asociacionit të Komunave me Shumicë Serbe, duke dhënë garanci se drafti i propozuar nga Bashkimi Evropian është i mirë dhe brenda Kushtetutës së Kosovës.

“Siç e dini statuti është prezantuar nga BE, por edhe SHBA është pjesë e kësaj. Është konsideruar nga ne që respekton plotësisht Kushtetutën e Kosovës. Pozita jonë është që Asociacioni duhet të jetë brenda kushtetutshmërisë së Kosovës, duhet të jetë në përputhje me vendimin e gjykatës kushtetues, nuk duhet të ketë autoritet ekzekutiv. Nuk do të jetë shtresë e re e qeverisjes”, pohoi Hovenier.

Ai shtoi se SHBA beson që “drafti që i është dhënë Kosovës plotëson të gjitha këto kritere. Është shkruar në atë mënyrë që është në përputhje me Kushtetutën, por ka vetëm një mënyrë për ta vërtetuar këtë dhe është vendimi i Gjykatës Kushtetues”.

Ambasadori u ankua se “histeria” rreth draftit është e panevojshme, pasi “statuti do të shkojë në Gjykatën Kushtetuese”.

Hovenier gjithashtu foli në terma pozitiv për Kurtin, duke thënë se “kryeministri e njeh gatishmërinë e tij që ka pranuar marrëveshjen në tërësinë e vet disa javë më parë” dhe se “ne gjithashtu po punojmë që Asociacioni të bëhet si element i një strategjie më të gjerë, sepse kjo s’ka të bëjë veç me Asociacionin. Ka të bëjë me zbatimin e të gjitha obligimeve nga Kosova dhe Serbia, Marrëveshjen Bazike dhe Aneksin e Ohrit”.

Diplomatit amerikan nuk i ka pëlqyer që po ka shumë njerëz që po e diskutojnë draftin e statutit kur ai ende nuk është publik për t’u lexuar fillimisht.

“Jam i habitur nga numri i njerëzve që po e interpretojnë draftin që akoma nuk e kanë parë. Kjo është e çuditshme. Ata që nuk e kanë parë draftin s’kanë shumë hapësirë për të diskutuar rreth draftit”.

Duke folur për pamundësinë e leximit të draftit, meqë ai nuk po publikohet nga Qeveria e Kosovës, Hovenier tha se “s’ka asgjë sekrete këtu, por negociatat diplomatike dhe angazhimi diplomatik shpesh është në këtë formë, që të vihet te një kuptueshmëri më e madhe mes palëve”.

“Gjithkund më parë ka pasur gjëra që kanë qenë konfidenciale (Rambuje, Vjenë). Në një kohë të duhur publiku do të ketë mundësinë t’i qaset draft statutit”.

Amerikani ripërmendi faktin se janë kohë të vështira dhe është emergjencë e momentit që të lëvizet shpejt përpara.

“Nëse i lexoni deklaratën e përbashkët të Macron, Scholz dhe Meloni ata përdorin fjali si ‘urgjente’, ‘sa më shpejt që është e mundur’. Prandaj ka një situatë të tillë, duhet të lëvizet me urgjencë, nuk ka asnjë arsye që Kosova të mos lëvizë përpara me këtë statut”.

Në fund të konferencës së shkurtër, Hovenier pohoi se si mund të konsiderohet Asociacioni një autonomi për serbët kur “s’formon shtresë të re, s’ka autoritet ekzekutiv dhe duhet të jetë brenda Kushtetutës së Kosovës”.

“Nuk e shoh si ka autonomi në këto kushte. Drafti i Statutit konfirmon kriteret që i thash më lartë”, pohoi ambasadori amerikan.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.