Vuçiç flet përsëri për “kornizën e re” të dialogut: Propozimi gjermano-francez është në tavolinë, pozicioni i Serbisë po komplikohet

Presidenti i Serbisë, Aleksandër Vuçiç, përsëri ka folur për “kornizën e re” të dialogut e publikuar nga Albanian Post, duke bërë të ditur se propozimi i këshilltarëve për politikë të jashtme të Scholz dhe Macron është në tavolinën e bisedimeve në kuadër të dialogut me Kosovën.

Pozicioni i Serbisë, sipas Vuçiç, po bëhet gjithnjë e më i komplikuar pasi që “në tavolinën e bisedimeve është propozimi i dy shteteve më të fuqishme të Evropës i cili nuk mund të hidhet nga dritarja”.

“Thelbi i propozimit të Gjermanisë dhe Francës është që Serbia të lejojë hyrjen e Kosovës në të gjitha institucionet dhe organizatat ndërkombëtare, duke përfshirë edhe OKB-në, në anën tjetër Serbia të përfitoj hyrje të shpejtë në BE dhe ndoshta përfitime të konsiderueshme financiare”, ka thënë Vuçiç në një konferencë për media.

Gabimi më i madh i Serbisë, sipas Vuçiç, është se ka pranuar që dialogu të udhëhiqet nga Bashkimi Evropian, duke mos arritur ta ngrit çështjen e formimit të Asociacionit në mënyrë serioze.

Sipas Vuçiç, Beogradi nuk duhet të pajtohet që Kosova të bëhet anëtare e Organizatës së Kombeve të Bashkuara ani pse po parashihen përfitime të mëdha financiare për Serbinë nga korniza e re e dialogut.

“Mund të na marrin gjithçka, por do të luftojmë edhe pse perspektivat janë të këqija”, ka shtuar ai.

Por, sido që të jetë, ka shtuar Vuçiç, “në këtë moment në konsultime me kryeministren është konstatuar se nuk ka vullnet për të pranuar pavarësinë e Kosovës dhe anëtarësimin në OKB”.

Ndryshe javë më parë kryeministri i Kosovës, Albin Kurti kishte refuzuar ta komentonte “kornizën e re” të dialogut e publikuar nga Albanian Post, në të cilën parashihej se në vitin 2023 duhet të nënshkruhet marrëveshja e dytë për normalizim të marrëdhënieve, pas asaj të vitit 2013, me të cilën Serbia faktikisht e pranon realitetin e Kosovës shtet të pavarur, por nuk e njeh formalisht.

Sipas Kurtit, ai nuk mund të fliste për një dokument e cila nuk ka autor.

“Qarkullojnë dokumente të ndryshme mirëpo unë besoj që nuk është as e dobishme as e drejtë që unë t’i komentojë ato dokumente që nuk kanë autorë dhe bëhen për të matur pulsin e qytetarëve dhe të politikanëve”, kishte deklaruar Kurti, në një konferencë për media pas Samitit Digjital për Ballkanit Perëndimor.

Për të parin e ekzekutivit, dokumentet për t’u komentuar janë vetëm ato dokumente të cilat prodhohen në kuadër të dialogut në Bruksel.

“Vetëm dokumentet që prodhohen në dialogun në Bruksel duhet të merrni si zyrtare dhe të denja për tu komentuar nga ana ime, unë nganjëherë do të thoshe edhe nga ana juaj, pra nuk është mirë që të bëjmë komente për komente të cilët autori nuk i dihet”, ka shtuar ai.

Ekskluzive, “korniza e re” në dialog: Marrëveshje përmbajtësore vitin e ardhshëm, finalja pas 10 vjetësh – Kosova fiton njohje nga 5-shja e BE’së, anëtarësim në organizata; Serbia përfiton ndihma masive

Të dielën e 18 shtatorit, Albanian Post publikoi dokumentin katër faqesh i cili paraqiste planin në kornizën e re për marrëveshje në mes të Kosovës e Serbisë, i përpiluar pas angazhimit të këshilltarëve të presidentit Emmanuel Macron dhe kancelarit Olaf Scholz, të cilin e ka siguruar Albanian Post.

Aty thuhet se në vitin 2023 duhet të nënshkruhet marrëveshja e dytë për normalizim të marrëdhënieve, pas asaj të vitit 2013, me të cilën Serbia faktikisht e pranon realitetin e Kosovës shtet të pavarur, por nuk e njeh formalisht.

Në një fazë të mëvonshme, hipotetikisht pas 10 vitesh, atëherë kur BE-ja është e gatshme të zgjerohet dhe ta përfshijë Ballkanin perëndimor, arrihet marrëveshja për njohje të ndërsjellë, si parakusht i të dy shteteve për anëtarësim në BE.

Me marrëveshjen e vitit të ardhshëm (nëse pranohet propozimi) Kosovën e pranojnë edhe pesë shtetet që akoma nuk e kanë njohur të Bashkimit Evropian, kurse Serbia do të përfitojë një ndihmë masive financiare, asistencë ekonomike dhe do njihet si fuqia e rajonit.

“Korniza e re” të cilën e publikoi Albanian Post është propozimi i ri i ardhur direkt nga përfshirja e Macron e Scholz në procesin e dialogut, sepse siç thuhet në dokument “Kosova e Serbia në vete nuk do të mund ta zgjidhin kurrë problemin”.

Dokumenti shpjegon logjikën prapa kornizës së re, përmban vizionin 10 vjeçar të zgjidhjes së problemit dhe jep një “makro-perspektivë”.

Përbëhet nga hyrja dhe më pas është i ndarë në tri segmente bashkë me tre nën-titujt që përmbajnë 13 pika.

Të gjitha segmentet shpjegojnë të ashtuquajturën “kornizën e re”, e cila u është prezantuar Albin Kurtit e Aleksandër Vuçiç-it. Këtë kornizë, publikisht, e ka pranuar vetëm Presidenti serb Vuçiç pas vizitës së dy këshilltarëve në Beograd.

Propozimi në fund parasheh edhe si të vazhdohet tutje nëse Kosova dhe Serbia nuk pranojnë këtë propozim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.