Vuçiç e fton Abazoviçin në takimin e radhës të “Open Balkan” në Ohër, flasin për ndërlidhje ekonomike të Ballkanit Perëndimor

“Marrëdhëniet me Serbinë janë prioritet”, ka thënë kryeministri i Malit të Zi, Dritan Abazoviç, pas takimit të parë të tij me Presidentin e Serbisë, Aleksandër Vuçiç.

“Jemi të gatshëm për bashkëpunim intensiv në të gjitha fushat me interes të përbashkët”, u shpreh Abazoviç përmes një postimi në Facebook ku lajmëroi takimin e tij të parë me Aleksandër Vuçiç që kur morri detyrën e shefit të ekzekutivit malazez.

Abazoviç u shpreh i bindur se me të në krye të qeverisë, Mali i Zi po bën përpjekje maksimale për të promovuar politikën e bashkëpunimit rajonal, pajtimit, bashkëjetesës dhe ndërlidhjes më të mirë ekonomike në Ballkanin Perëndimor.

Presidenti serb shkroi në Facebook se e ka ftuar Abazoviçin në takimin e radhës të nismës “Open Balkan” në Ohër.

“Mundësi e shkëlqyeshme për të biseduar për çështjet dypalëshe me Dritan Abazoviç gjatë World Economic Forum”, shkroi Vuçiç.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.