Kosova

Vuçeviç: Hill, diplomat serioz – askush në Serbi s’e nënshkruan njohjen e Kosovës  


Millosh Vuçeviç

Kryeministri i Serbisë, Millosh Vuçeviç, e ka konsideruar si “diplomat serioz” ambasadorin e Shteteve të Bashkuara të Amerikës në Serbi, Christopher Hill, i cili një ditë më parë deklaroi se Bashkimi Evropian nuk do të kërkojë nga Beogradi zyrtar ta njohë de jure pavarësinë e Kosovës nëse anëtarësohet në Union.

Në vlerësimin e Vuçeviç, askush në Serbi nuk do ta nënshkruaj një marrëveshje për njohjen e Kosovës.

Duke komentuar rrjedhën e dialogut ndërmjet Kosovës dhe Serbisë e ndërmjetësuar nga BE-ja, Vuçeviç potencoi se “zgjidhja e çështjes është shumë larg”.

“Zgjidhja as nuk është e mundur në këto rrethana. Zgjidhjet që pala shqiptare të marrë gjithçka, ndërsa pala serbe asgjë, nuk është absolutisht e mundshme, andaj qasja aktuale është e gabuar”, ka thënë Vuçeviç, raporton mediumi serb me seli në Kosovë, Kosovo Online.

Vuçeviç ka potencuar ndër të tjera se në dialog nuk duhet diskutuar për njohje, por për të zgjidhur çështje të vogla, që lehtësojnë jetët e njerëzve.

Hill potencoi se Bashkimi Evropian nuk do të kërkojë nga Beogradi zyrtar ta njohë de jure pavarësinë e Kosovës nëse anëtarësohet në Union.

Në vlerësimin e tij BE-ja po kërkon nga Serbia vetëm normalizimin e raporteve me Kosovën.

“Mendoj se ata kanë thënë shumë qartë se ka anëtarë të BE-së që nuk e njohin Kosovën, kështu që çështja e vërtetë është të përpiqemi të arrijmë normalizimin ku ata kufij nuk do të jenë kufij që ndajnë, por kufij që bashkojnë”, ka thënë Hill, raporton mediumi serb, N1.

Ndaj deklaratave të Hill ka reaguar Ambasadori i Gjermanisë në Kosovë, Jorn Rohde, i cili kujtoj deklaratat e kancelarit gjerman, Olaf Scholz.

Rohde nëpërmjet një postimi në platformën sociale, X, kërkoi që të lexohet deklarata e Scholz-it e artikuluar gjatë vizitës së tij të fundit në Kosovë dhe Serbi në qershorin e vitit 2022.

Scholz në qershorin e vitit 2022 tha se është e “paimagjinueshme që Kosova dhe Serbia, të cilat nuk e njohin njëra-tjetrën të bëhen anëtare të BE-së”.

“Kjo deklaratë ende qëndron. Rruga është atje: zbatimi i plotë i marrëveshjeve të Brukselit/Ohrit nga të dyja palët sa më shpejt”, ka shkruar ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore