Votimi në Veri, Stano: Rezultati s’i kontribuon shtensionimit dhe kthimit të serbëve në institucione

“Rezultati nuk kontribuon në shtensionim dhe të hapë rrugën për kthimin e serbëve në institucionet e Kosovës, që është thelbësore për normalizimin e marrëdhënieve”.

Kështu tha zëdhënësi i Bashkimit Evropian, Petër Stano, për Radion Evropa e Lirë pasi u pyet për procesin e votimit për largimin ose jo të kryetarëve shqiptarë në katër komunat në veri të Kosovës që u mbajt të dielën.

Ndërkaq sa i përket largimit të masave që u janë vendosur Kosovës nga BE-ja për mos shtensionim të situatës në Veri, ai ka theksuar se Këshilli do të diskutojë masat bazuar në raportin e Përfaqësuesit të Lartë lidhur me plotësimin e kërkesave të BE-së.

“Sa u përket masave, në linjë me konkluzat e 12 dhjetorit 2023, Këshilli do të diskutojë për masat e BE-së, të bazuara në një raport të Përfaqësuesit të Lartë për përmbushjen e kërkesave të bllokut evropian”, potencoi ai.

Ndryshe, Qeveria e Kosovës, ka kërkuar sërish nga Bashkimi Evropian që t’i tërheq masat “e padrejta”, pas mbajtjeve të zgjedhjeve në katër komunat veriore të dielën e 21 prillit, kjo pasi të njëjtit konsiderojnë që tashmë obligimet nga ana e Kosovës janë përmbushur.

Një proces i nisur mëngjesin e 21 prillit, suksesi i të cilit do të përcaktonte rrjedhën e mëtejshme të zhvillimeve politike në pjesën veriore të Kosovës, dështoi që në start për shkak të bojkotimit në masë të komunitetit serb në Kosovë.

Derisa katër kryetarët shqiptarë të komunave veriore të banuara me shumicë serbe do të vazhdojnë mandatin për të paktën edhe një vit.

Komisioni Qendror i Zgjedhjeve (KQZ) njoftoi të dielen në mbrëmje se kriteri prej 50 për qind plus një votë në katër komunat veriore të vendit – Leposaviq, Zubin-Potok, Zveçan dhe Mitrovicë e Veriut – nuk është përmbushur dhe rrjedhimisht, mini-referendumi kushtetues për largimin e katër kryetarëve shqiptarë nga pozita udhëheqëse u shpall i dështuar.

Një numër i vogël i qytetarëve në komunat veriore shfrytëzoi të dielen të drejtën e votës për të votuar për ose kundër shkarkimit të kryetarëve aktual.

Në kulmin e tensioneve midis Kosovës dhe Serbisë, partia kryesore e serbëve të Kosovës vendosi që edhe njëherë t’u bëjë thirrje qytetarëve të komunitetit serb në veri që të mos u përgjigjen proceseve demokratike në vend.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.