Përhapja e lijes së majmunëve në vendet e botës nuk e rrezikon Kosovën, të paktën kështu thonë nga institucionet shëndetësore.
Drejtori i Klinikës Infektive në Qendrën Klinike Universitare të Kosovës, Arben Vishaj, ka thënë se Kosova nuk rrezikohet nga ky virus.
“Por e di që në vendin tonë nuk kemi raste të regjistruara me linë e majmunëve. Nuk e mendoj që jemi të rrezikuar nga ardhja e diasporës dhe Kosova sikurse çdo pjesë e botës është në kontakt me vendet e Evropës”, u shpreh Vishaj.
Ai tutje në një intervistë për agjencinë e lajmeve Ekonomia Online, ka bërë të ditur se në klinikë janë duke u trajtuar 11 pacientë me COVID-19.
“Në klinikën infektive tani i kemi 11 pacientë. Gjatë ditës do t’i lëshojmë edhe 5 pacientë dhe mbesin në repart 6 pacientë. Tani e kemi një pacient që do ta transferojmë nga qendra emergjente në mjekimin intensiv të klinikës intensive. Kemi kapacitet prej 125 pacientëve dhe për momentin kemi vetëm 6 pacientë të shtrirë”.
Më 9 qershor, Instituti Kombëtar i Shëndetësisë Publike të Kosovës (IKSHPK), kishte konfirmuar për Albanian Post se është duke planifikuar të blejë një mijë teste për identifikimin e virusit të Lisë së Majmunëve.
Kështu kishte bërë të ditur zëdhënësja e IKSHPK-së, Era Pireva.
“IKShPK do të blejë 20 pako me nga 50 teste, pra gjithsej do të blihen një mijë teste”, ka deklaruar Pireva për AP.
Çka është sëmundja e lijës së majmunëve?
Albanian Post, javë më parë kishte realizuar një temë lidhur me çështjen e Lijës së Majmunit, pasi i njëjti ishte përhapur me shpejtësi në vende të ndryshme të botës.
Lidhur me këtë infektologu, Gëzim Morina, kishte thënë për AP se “lija e majmunit është sëmundje virale, zonotike që shfaqet kryesisht në zonat tropikale të Afrikës Qendrore dhe Perëndimore që i takon grupit ORTHOPOXIVIRUS të familjes POKSIVIRIDAE që janë dy variante”.
“Varianti i Kongos i cili është me i rëndë, me vdekshmëri 10 për qind dhe i dyti është varianti i Afrikës Perëndimore i cili është variant më i butë i cili ka vdekshmëri 1% të rasteve të prekura, fatmirësisht rastet e raportuara në Evropë i takojnë variantit të Afrikës Perëndimore”
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
