Veriu në prag të shpërthimit, situata më e rëndë që 10 vjet – Borell në konferencë të jashtëzakonshme për media

Situata në Veri të Kosovë është në prag të shpërthimit dhe kryenegociatori, Besnik Bislimi tashmë është nisur për Bruksel që bashkë me homologun e tij serb, Petar Petkoviç, të gjejë një zgjidhje urgjente, ka thënë në konferencë të jashtëzakonshme për media, Përfaqësuesi i Lartë i Politikës së Jashtme të Bashkimit Evropian, Josep Borell, duke shtuar gjithashtu se Kosova duhet ta shtyjë vendimin për targat dhe ta fillojë themelimin e Asociacionit të Komunave me Shumicë Serbe.

Borell ka deklaruar se lirisht mund të pohojë se situatë më të tensionuar nuk ka pasur tash e 10 vjet.

“Gjatë vikendit kam qenë i zënë në Paris, në diskutime mes Kosovës dhe Serbisë. Angazhimi im si ndërmjetësues është për të ulur tensionet e panevojshme dhe kundërproduktive mes tyre. Më duhet të them se këto tensione po arrijnë një nivel shumë të rrezikshëm. Jemi në prag të fazës më serioze dhe më të rrezikshme qysh nga viti 2013, pra në 10 vitet e fundit”, deklaroi Borell.

Borell ka thënë se puna do të fillojë qysh sonte me të dyja palët dhe një zgjidhje për targat medoemos duhet të gjendet para datës 21 nëntor, kur fillon edhe masa e gjobitjes.

“Të dyja palët duhet urgjentisht të gjejnë gatishmëri për të ulur këto tensione. Nuk është e pranueshme nga asnjëra palë që të mos respektojnë obligimet e tyre në dialog”, pohoi Borell.

“Do të fillohet të gjendet një zgjidhje sonte. Pala kosovare po vjen sonte në Bruksel. Unë do të arrij t’i bindim liderët, nëse negociatorët do të gjejnë një zgjidhje praktike për çështjen e targave para datës 21 nëntor”.

Borell, në më shumë se në një rast gjatë fjalës së tij, e ka përshkruar gjendjen aktuale në veri si “të rrezikshme”.

“Nuk bën të arrijmë këtë datë pa pasur një marrëveshje, ose do jemi në prag të një situate të rrezikshme. Largimi i policisë në Veri ka krijuar një vakum dhe në këtë vakum më e keqja mund të ndodhë. Prandaj të dyja palët duhet të tregojnë fleksibilitet më të madh”, deklaroi ai.

Meqë konferenca po mbahej pas mbledhjes së Këshillit të ministrave, ai ka prezantuar edhe qëndrimin e tyre.

“Mesazhi nga Këshilli është i qartë: ne duam më shumë progres. Ne prezantuam një propozim. Falënderoj Gjermaninë dhe Francën që fuqishëm përkrahën këtë propozim. Serbët e Kosovës duhet të kthehen në institucione”, tha Borell.

Kryediplomati i BE-së ka folur edhe një herë për nevojën e shtyrjes së afatit për targa dhe Asociacionin.

“Autoritet e Kosovës duhet të tregojnë fleksibilitet për çështjen e targave dhe të punojnë për implementimin e marrëveshjes për Asociacionin e Komunave me Shumicë Serbe pa vonesë. Meqë janë vende që kanë aspirata për një të ardhme evropiane, ne presim një sjellje evropiane nga ta”.

“Presim gatishmëri për zgjidhje evropiane, ky është parakusht bazik. Janë në udhëkryq tani, duhet të vendosin kah do të shkojnë, kah BE-ja, apo kah e kaluara”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.