Një shtetase e Argjentinës raportohet se ka vdekur të martën në Qendrën Klinike Universitare të Kosovës.
Lajmi është bërë i ditur përmes raportit 24-orësh të Policisë së Kosovës.
“Fushë Kosovë 01.08.2023 – 01:59. Nga QKUK-ja është raportuar se ka ndërruar jeta viktima femër shtetase e Argjentinës si pasojë e lëndimeve të marra, që dyshohet se ka rënë nga një lartësi e objektit ku ka qenë duke qëndruar së bashku me te dyshuarin mashkull shtetas zviceran”, thuhet në raportin policor.
Rasti nga policia është iniciuar si vrasje.
Po ashtu, katër persona janë arrestuar të martën në Rahovec, për shkak të një mosmarrëveshje janë përleshur mes vete.
“Janë arrestuar katër të dyshuar meshkuj kosovarë, ku fillimisht pas një mosmarrëveshje në mes të dy të dyshuarve të cilët ishin përleshur në mes veti, në ndihmë njërit prej tyre i kishin shkuar edhe dy të dyshuar tjerë dhe kishin sulmuar fizikisht të dyshuarin tjetër”.
I dyshuari është thënë se kishte shtënë disa herë me pistoletë në drejtim të panjohur për të cilën armë posedon leje.
“Njësitet policore kanë dalë në vendin e ngjarjes, nga i dyshuari kanë sekuestruar një pistoletë me dy karikatorë me 136 fishekë, 113 fishekë të pistoletës me gaz dhe tri gëzhoja”, bëhet e ditur tutje.
Të dyshuarit kanë pranuar tretman mjekësor dhe pas intervistimit me vendim të prokurorit janë dërguar në mbajtje.
Rasti është iniciuar si “Armëmbajtje pa leje, përdorim i armës apo mjetit të rrezikshëm dhe lëndim i lehtë trupor”.
Po ashtu, edhe katër persona janë arrestuar në Deçan pasi dyshohet se janë përleshur mes vete për shkak të një aksidenti në trafik.
Policia ka njoftuar se të katër të arrestuarit kanë pësuar lëndime trupore në rrahjen që ndodhi të martën.
“Janë arrestuar katër të dyshuar meshkuj kosovarë të cilët pas një zënke rreth një aksidenti në trafik janë përfshirë në rrahje dhe si pasojë kanë pësuar lëndime dhe kanë pranuar tretman mjekësor. Me vendim të prokurorit të dyshuarit pas intervistimit janë dërguar në mbajtje”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
