Vdes gruaja që u plagos në Prishtinë

Ka ndërruar jetë edhe gruaja 49-vjeçare që u plagos të martën në Prishtinë, e cila kishte qëlluar rastësisht pjesëmarrëse në trafik në momentin e të shtënave.

Lajmin e ka konfirmuar shefi i Klinikës së Mjekimit të Intensives, Shaqir Uka.

“Pacientes të cilës ju i referoheni është sjellë mbrëmë në Njësinë e Mjekimit Intenziv pas intervenimit kirurgjik që është dashur të kryhet në sallën operative të Qendrës Emergjente ku është sjellë paraprakisht për shkak të lëndimeve që ka pësuar me armë zjarri”, ka thënë Uka për media.

Edhe një person kishte vdekur pas plagosjes që kishte ndodhur në Prishtinë, të martën.

Lajmin e kishte konfirmuar zëdhënësi i Policisë, Agron Borovci, i cili kishte thënë se edhe dy persona të tjerë ishin lënduar – njëra prej tyre ishte 49 vjeçarja.

“Me të marrë informatën, policia ka dalë në vendin e ngjarjes dhe nga informacionet e para është bërë e ditur se për pasojë dy persona kanë marrë plagë nga arma e zjarrit ku fatkeqësisht njëri nga ta ka ndërruar jetë”.

“Ndërkohë që e plagosura është dërguar në QKUK për trajtimin e nevojshëm mjekësor”.

Nga policia është thënë se po vijon punën e saj me veprime të ekzaminimit të vendngjarjes, si dhe me veprime të tjera operativo-hetimore me qëllim të identifikimit të dyshuarve dhe sqarimin e plotë të rrethanave të ngjarjes.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.