Vatikani i kthen Greqisë skulpturat e Partenonit

Vatikani i ka kthyer Greqisë tre fragmente të skulpturave të Partenonit, në një lëvizje që është përshkruar si një “gjest miqësie”.

Vendimi për kthimin e mermereve 2 mijë e 500 vjeçare u njoftua nga Papa Françesku vitin e kaluar.

Lajmi u bë i ditur nga multimediali britanik “BBC”.

Njëra copë është një kokë kali, tjetra është një burrë me mjekër dhe e treta një kokë djali.

Greqia shpreson se masa do të nxisë institucionet e tjera jashtë shtetit që mbajnë skulptura të Partenonit t’i kthejnë ato.

Rreth 50 për qind e skulpturave origjinale të Parthenonit kanë mbijetuar dhe pothuajse gjysma e tyre ndodhen në Muzeun Britanik.

“Ceremonia e sotme … e ngjashme me gjestin e qeverisë së Siçilisë dhe Republikës së Italisë disa muaj më parë, tregon rrugën që ne mund të ndiqnim, që të gjithë mund të ndiqnin, për të rivendosur unitetin e Partenonit”, tha të premten ministrja e kulturës e Greqisë Linda Mendoni.

Ndërsa mermerët u kthyen, personalitetet shkëmbyen shtrëngime duarsh dhe buzëqeshën para kamerave, përfshirë kreun e Kishës Ortodokse Greke, Kryepeshkopin Ieronymos.

Mermeret kishin qenë në koleksionin papal dhe në muzetë e Vatikanit për shekuj.

Por Greqia është përpjekur t’i rimarrë ato nga Vatikani dhe koleksionet e tjera evropiane që nga fillimi i shekullit të 20-të.

Në fillim të viteve 1800, dhjetëra mermere u morën nga Partenoni i Greqisë me urdhër të fisnikut skocez Thomas Bruce, i njohur si Lord Elgin.

Më pas ai ia shiti mermeret qeverisë britanike, e cila më pas i ekspozoi në Muzeun Britanik.

Raportet kanë sugjeruar se kryetari i Muzeut Britanik, George Osborne, është afër arritjes së një marrëveshjeje me Greqinë.

Në janar, sekretarja e atëhershme e kulturës në Mbretërinë e Bashkuar, Michele Donelan tha se skulpturat “i përkasin” Britanisë.

Muzeu Britanik nuk lejohet me ligj të kthejë përgjithmonë veprat e artit në Greqi.

Por kishte spekulime se një marrëveshje mund të përfshinte skulpturat që shkojnë në Athinë me huazim në rotacion, në këmbim të objekteve klasike që nuk janë parë kurrë më parë jashtë Greqisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.