Unilever po shkurton vendet e punës dhe po ndan njësinë e akullores

Unilever do të ndajë biznesin e akullores dhe do të shkurtojë 7 mijë e 500 vende pune.

Shefi i ri ekzekutiv Hein Schumacher po përpiqet të përmbushë premtimin e tij për të kthyer performancën e një prej grupeve më të mëdha në botë të mallrave të konsumit.

Unilever ka njoftuar se divizioni i akullores, shtëpia e markave duke përfshirë Wall’s, Magnum dhe Ben & Jerry’s dhe që përbën 16 për qind të shitjeve të përgjithshme, do të ishte më mirë si një biznes i pavarur.

Schumacher, i cili që nga marrja e postit të lartë korrikun e kaluar ka qenë nën presion të madh për të shkundur Unilever pas disa vitesh rritjeje të dobët, ka thënë se ende nuk është marrë asnjë vendim përfundimtar se si do të ndahet divizioni.

Grupi ishte “i hapur ndaj opsioneve” se ku mund të listohej biznesi, i cili është në proces të zhvendosjes në një zyrë në Amsterdam, sipas Schumacher.

Biznesi aktualisht operon nga Roterdami, së bashku me divizionin e ushqimit.

Ndarja sakaq do ta lërë Unilever me katër biznese që mbulojnë bukurinë dhe mirëqenien, kujdesin personal, kujdesin në shtëpi dhe ushqimin.

Kombinimi i operacioneve të shumta të Unilever dhe rritja e ngadaltë tërhoqi interesin e aktivistit miliarder Nelson Peltz, i cili nxiti për ndryshime.

Krahas planit për biznesin e akullores, Unilever ka bërë me dije gjithashtu se do të thellonte masat për uljen e kostove dhe po synonte 800 milionë euro kursime gjatë tre viteve të ardhshme.

Rreth 7 mijë e 500 vende pune do të hiqen si pjesë e programit, me shumicën “me bazë në zyrë”.

Unilever, e cila punëson rreth 128 mijë njerëz, nuk ka thënë se ku do të shkurtohen vendet e punës apo nga cilat funksione.

Fernando Fernández, shefi i ri financiar i Unilever, ka thënë se grupi po zbatonte një “program gjithëpërfshirës teknologjik” si pjesë e kursimeve të kostos dhe se inteligjenca artificiale do të luante një rol.

Edhe pse divizioni i akulloreve ka marzhe më të ulëta se pjesët e tjera të biznesit, Ben & Jerry’s ka rezultuar gjithashtu i mundimshëm për menaxhmentin e Unilever.

Ben & Jerry’s, i cili ka pasur një bord të pavarur që kur u ble nga kompania anglo-holandeze, është përplasur vazhdimisht me Unilever për qëndrimin e markës së akullores ndaj politikës izraelite.

Duke paraqitur arsyet e largimit nga biznesi i akullores, Unilever vuri në dukje mungesën e mbivendosjes në zinxhirët e furnizimit me pjesën tjetër të kompanisë.

Dhe ka thënë se ishte më sezonale.

Kompania synon të përfundojë ndarjen deri në fund të vitit të ardhshëm.

Pas ndarjes së biznesit të akullores dhe kursimeve shtesë të kostos, Unilever do të ketë një “marzh strukturor më të lartë”, ka thënë kompania.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.