UNESCO bën thirrje për rregullim më efektiv të rrjeteve sociale

Drejtoresha e Përgjithshme e UNESCO-s, Audrey Azoulay, bëri thirrje për një dialog global për të gjetur një mënyrë për të rregulluar sjelljen e kompanive që zotërojnë rrjetet sociale dhe për të kufizuar rolin e tyre në përhapjen e dezinformatave, raporton Associated Press.

Azoulay po fliste në një tubim ndërkombëtar në Paris kushtuar rregullimit të rrjeteve sociale, si Twitter, për ta bërë internetin më të sigurt dhe informacionin e bazuar në fakte.

Konferenca dyditore përpiqet të përcaktojë udhëzime që do të ndihmonin organet rregullatore, qeveritë dhe kompanitë të trajtojnë përmbajtjen që minon demokracinë dhe të drejtat e njeriut, duke ruajtur lirinë e shprehjes dhe duke forcuar aksesin në informacion të saktë dhe të besueshëm.

Azoulay i tha agjencisë AP se mjetet ligjore dhe parimet e përgjegjësisë për pronarët e rrjeteve sociale duhet të dalin nga dialogu global në mënyrë që ata të veprojnë për të mirën publike.

“Do të zvogëlonte rreziqet që shohim sot, me të cilat jetojmë sot, me dezinformatat dhe teoritë e konspiracionit që përhapen më shpejt se e vërteta”, theksoi ajo.

Vitin e kaluar, Bashkimi Evropian miratoi një rregullore që do të detyrojë kompanitë e mëdha të teknologjisë si Alphabet dhe Meta të rregullojnë më rreptësisht platformat e tyre, si Google, Facebook dhe Instagram, për të mbrojtur përdoruesit në Evropë nga gjuha e urrejtjes, keqinformimi dhe përmbajtja e dëmshme.

Kjo rregullore është një nga tre rregulloret e rëndësishme evropiane që synojnë industrinë e teknologjisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.