“Unë dhe ministri s’mund ta largojmë askënd nga puna”, Zëvendësministri Durimishi për rastin e Nexhat Krasniqit

Zëvendësministri i Infrastrukturës, Hysen Durmishi, ka thënë për Albanian Post se ka filluar një procedurë disiplinore ndaj Nexhat Krasniqit, pasi ky i fundit u shpall person “non grata” nga Shtetet e Bashkuara të Amerikës me arsyetimin se është përfshirë në korrupsion të madh gjatë kohës sa ka qenë Drejtor i Departamentit të Prokurimit në Ministrinë e Tregtisë dhe Industrisë.

“Sa unë kam informata, Sekretari ka filluar një procedurë disiplinore ndaj zotëri Nexhat Krasniqit dhe shumë shpejt pritet vendimi i Komisionit Disiplinor. Ministri ose zëvendësministri nuk kanë të drejt me marrë vendim për ta pranuar dikë në punë, ose për ta larguar dikë nga puna. Kjo është punë e Sekretarit dhe ai duhet ta marrë një vendim, duke u bazuar në ligj”, tha ai.

Por, Krasniqi i njohur si “baba i tenderëve” është caktuar përkohësisht në pozitën e Drejtorit të Departamentit të Infrastrukturës Rrugore në këtë ministri, derisa Durmishi është munduar ta arsyetojë këtë vendim të MMPH-së.

“Ne kemi marrë veprime menjëherë në momentin që është dalë lajmi prej Departamentit të Shtetit, ne e kemi pezulluar nga pozita që e ka pasur Krasniqi. Përkohësisht është angazhuar me një pozitë tjetër që nuk ka lidhje me prokurim. Po e presim vendimin e Komisionit Disiplinor. I kam parë reagimet, por duhet ta ndjekim një procedurë”, potencoi Durmishi.

Ndryshe, Departamenti Amerikan i Shtetit e kishte vendosur në listën e sanksioneve Krasniqin për shkak të përfshirjes në korrupsion.

“Si zyrtar publik përgjegjës për mbikëqyrjen e kontratave të prokurimit, Krasniqi ka abuzuar me postin e tij publik duke pranuar ryshfet në këmbim të dhënies së kontratës për lejimin e ndërtimit të parkut industrial në komunën e Drenasit nga kompania Eltoni”, u tha në njoftim.

Pos Krasniqit, nën sanksione janë vendosur edhe fëmijët e tij, Aulona dhe Olti të cilëve po ashtu nuk do t’iu lejohet hyrja në ShBA.

Për rastin për të cilin është sanksionuar, Gjykata Themelore në Prishtinë e ka dënuar Krasniqin me 26 muaj burgim efektiv, ndërsa pas ankesës në Apel, dënimi i është zvogëluar në 18 muaj burgim me kusht, dhe i është lejuar edhe ushtrimi i funksionit publik.

“Arsyetimi” i Krasniqit

Krasniqi ka reaguar pas sanksionimit nga Departamenti Amerikan, derisa ka theksuar se nuk ka qenë i dënuar asnjëherë për korrupsion apo marrje ryshfeti.

“Në Republikën e Kosovës, ku jetoj e punoj, prej kur kam lind, kurrë në jetë nuk jam dënuar për korrupsion e as për marrje ryshfeti”, ka shkruar Krasniqi në Facebook.

Ndërsa tri organizata të shoqërisë civile, kanë reaguar kundër vendimit të Ministrisë së Mjedisit, Planifikimit Hapësinor dhe Infrastrukturës për kthimin e Nexhat Krasniqit në pozitën e Drejtorit të Departamentit të Infrastrukturës Rrugore.

Përmes një komunikate të përbashkët nga këto tri organizata është thënë se një “qeverisje e pastër” nuk do ta bënte kthimin e një zyrtari në pozitë të ngjashme siç ka qenë më herët.

“Llogaridhënia dhe qeverisja me duar të pastra nuk e duron rehabilitimin e figurës së personave të cilët kanë qenë të përfshirë në afera korruptive dhe që janë subjekt i sanksioneve nga ana e Shteteve të Bashkuara të Amerikës, shtet mik i Republikës së Kosovës”.

“Një qasje e tillë dëmton rëndë përpjekjet dhe përkushtimin e SHBA-ve dhe Bashkimit Evropian që përmes asistencës financiare dhe mbështetjes diplomatike për të ndërtuar dhe zhvilluar institucione kredibile, me integritet dhe të përkushtuara për të promovuar kërkesat për një shtet ku korrupsioni dhe dukuritë negative luftohen dhe assesi promovohen”, është thënë nga organizatat.

Tri organizatat, Instituti i Kosovës për Drejtësi, Iniciativa për Progres INPO, Lëvizja FOL kanë kërkuar nga Qeveria e Kosovës, që të ndalohet praktika e promovimit dhe rehabilitimit të personave të dënuar për vepra penale korruptive si rrugë e vetme dhe e ruajtjes së integritetit institucional dhe promovimit të shtetit ligjor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.