Ukrainë: Ushtari hap zjarr në një fabrikë – 5 të vdekur dhe 5 të plagosur

Ministria e Brendshme e Ukrainës thotë se të paktën pesë persona kanë mbetur të vrarë.

Kjo, pasi një anëtar i gardës kombëtare hapi zjarr në një fabrikë të hapësirës ajrore në lindje të vendit.

Të shtënat janë regjistruar në orët e para të së enjtes.

Sipas zyrtarëve ukrainas, sulmuesi hapi zjarr me një armë kallashnikov dhe u largua menjëherë nga vendi i ngjarjes.

“Si rezultat, pesë persona vdiqën dhe pesë të tjerë u plagosën”, shtoi ministria.

Mediat ndërkombëtare raportojnë se incidenti ndodhi në ish-fabrikën e raketave Pivdenmash.

Kjo e fundit quhet tanimë Yuzhmash dhe është një fabrikë e hapësirës ajrore që prodhon dhe teston materiale në lidhje me mbrojtjen, aeronautikën dhe bujqësinë.

Deklarata e ministrisë tha se vrasësi ka lindur në vitin 2001 dhe se po vijon operacioni për gjetjen e tij.

Ende nuk dihen motivet e krimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.