Ndryshimet e mëdha në futboll pritet të ndodhin shumë shpejt. Më shpejt nga sa pritej. Pas projektit të Superligës, idesë së Kupës së Botës çdo dy vjet, apo rregulloreve disa vjeçare që pritet të ndryshojnë, një tjetër ngjarje e re del në pah.
Sipas gazetës së përditshme italiane “La Gazetta dello Sport”, UEFA po mendon që Nations League ta zgjerojë edhe me kombëtare të tjera nga jashtë kontinentit të Evropës, apo dhe Azisë. Bëhet fjalë për kombëtare nga Amerika e Jugut, që janë pjesë e CONMEBOL-it.
Zyrtarë të të dy organeve drejtuese, UEFA-s dhe CONMEBOL-it janë vendosur së bashku në Londër për të hartuar një strategji të re rreth projektit. Ajo pritet të quhet Liga Ndërkontinentale e Kombeve.
Risia e parë është Superkupa mes kampionëve të Euro 2020, Italisë dhe atyre të Copa America 2021, Argjentinës. Ndeshja do të luhet në qershor të vitit 2022.
Nisma e re që po kërkon të ndërmarrë UEFA është si një kundërpërgjigje ndaj FIFA-s. Këta të fundit kërkojnë të organizojnë Kupën e Botës çdo dy vjet. Por, një organizim i tillë, bie ndesh me kompeticionet e UEFA-s, në nivel klubesh dhe kombëtaresh.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
