Twitter-i paditet nga Crown Estate për “qira të papaguar”

Twitter-i është paditur nga Crown Estate për gjoja dështimin për të paguar qiranë në selinë e tij në Londër.

Crown Estate, e cila menaxhon pronat që i përkasin mbretit Charles III, ka paraqitur një padi kundër Twitter-it në gjykatën e lartë në kryeqytetin e Mbretërisë së Bashkuar javën e kaluar.

Sakaq, shpenzimet e supozuara të qirasë kanë të bëjnë me hapësirën e zyrës pranë Piccadilly Circus në qendër të Londrës.

Crown Estate, e cila zotëron një portofol pronash me vlerë 15.6 miliardë paund, duke përfshirë 241 vendndodhje në Londrën qendrore, ka njoftuar se veprimi gjyqësor lidhej me “shumat e papaguara të qirasë” në hapësirën e zyrës së platformës së mediave sociale në qytet.

Ndërkohë, vendimi ka ardhur disa muaj pasi Twitter-i u mor nga Elon Musk, bashkëpronar i Tesla-s dhe SpaceX-it, në tetor të vitit të kaluar.

Musk pagoi 44 miliardë dollarë për platformën dhe shpejt nisi shkurtime gjithëpërfshirëse të vendeve të punës për fuqinë punëtore prej shtatë mijë personash të firmës, duke e shkurtuar atë me 50 për qind.

Por blerja prej tij nuk ka qenë pa probleme, duke përfshirë një rihapje kaotike të skemës së shënjimeve blu për përdoruesit e verifikuar që çoi në një numër llogarish imituese dhe reklamues që tërhiqen nga platforma për shqetësimet për një rritje të gjuhës së urrejtjes.

Po ashtu kompania e mediave sociale thuhet se u godit nga një rënie prej 40 për qind në të ardhurat pasi më shumë se 500 klientë ndaluan shpenzimet e tyre, me markat e profilit të lartë si Audi dhe Pfizer që ndaluan reklamat.

Kështu, Crown Estate ka ndërmarrë veprime ligjore pasi kishte kontaktuar më parë kompaninë e mediave sociale për borxhet e supozuara të qirasë në hapësirën e saj të zyrës.

John Wallace, një avokat dhe drejtor në firmën ligjore me bazë në Londër, Ridgemont, ka thënë se seanca dëgjimore midis tyre ka të ngjarë të zhvillohet në gjashtë muajt e ardhshëm.

Gjithashtu ai ka paralajmëruar se ekonomia në vështirësi e Mbretërisë së Bashkuar mund të çojë në një rritje të borxheve të pretenduara të qirasë.

“Tkurrja e ekonomisë së Mbretërisë së Bashkuar do të çojë në mënyrë të pashmangshme që pronarët komercialë të duhet të ndërmarrin veprime kundër qiramarrësve që nuk paguajnë”, ka theksuar avokati.

Crown Estate është një nga pronarët më të mëdhenj të tokave në Mbretërinë e Bashkuar dhe megjithëse portofoli i përket monarkut, nuk është pronë private.

Të ardhurat nga pasuria shkojnë në Thesar për shpenzime publike dhe në këmbim monarku merr grantin sovran.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.