Turizmi i kanabisit: Si po merr hov trendi i ri i udhëtimeve

Konsumi i ligjshëm i kanabisit u rrit në SHBA dhe Evropë gjatë pandemisë COVID-19, me disa njerëz që iu drejtuan marihuanës për t’i ndihmuar ata të përballen me bllokimet dhe monotoninë e përditshme.

Ndërkohë, më pak njerëz sot e shohin këtë lloj droge si të dëmshme në krahasim me dekadat e mëparshme.

Këta faktorë mund të kenë kontribuar në një prirje drejt turizmit të lidhur me kanabisin, me destinacione që zhvillojnë produkte të reja pushimi për të tunduar klientët drejt vendeve ku kanabisi është i ligjshëm.

Por ka rreziqe si për destinacionet, ashtu edhe për turistët që përqafojnë këtë tendencë.

Një studim nga MMGY Travel Intelligence zbuloi se 29% e udhëtarëve të kohës së lirë janë të interesuar për turizmin e lidhur me kanabisin.

Një studim i qeverisë holandeze zbuloi se 58% e turistëve ndërkombëtarë zgjedhin për të vizituar Amsterdamin vetëm për të konsumuar drogë. Dhe biznesi në kafenetë holandeze është rritur që nga fillimi i pandemisë.

Sektori i turizmit dhe destinacionet specifike kanë reaguar shpejt ndaj kërkesës për kanabis dhe produkteve të lidhura me CBD-në, duke krijuar përvoja që përfshijnë këto elemente.

Ata po i përgjigjen gjithashtu potencialit të pritshëm ekonomik që lidhet me rritjen e zënies së hoteleve, të ardhurat nga taksat, rritjen e vlerës së tokës, zgjerimin e biznesit, vendet e punës dhe përfitimet e shëndetit dhe sigurisë publike që mund të lidhen me shitjet e kanabisit.

Megjithatë, edhe pse turizmi drejt destinacioneve të tjera me kanabis të legalizuar, po rritet në popullaritet, të dhënat sapo kanë filluar të mblidhen.

Dhe, deri më tani, asnjë destinacion nuk është gati për t’u etiketuar si “Amsterdami i ardhshëm”.

Potencial i madh

Ndërsa udhëtarët e lidhur me kanabisin besohet të jenë me shpenzime të larta dhe të arsimuar mirë, autoritetet nuk duan të përsërisin modelin holandez, i cili çoi në përqendrim masiv të kafeneve të kanabisit në Amsterdam dhe ngriti shqetësime për përdorimin e drogave të forta dhe kriminalitetin.

Modelet e reja të biznesit po përqendrohen në agroturizmin, turizmin kulinar dhe ngjarje të tilla si festivalet e kanabisit.

Potenciali për turizmin e kanabisit është i përhapur në mbarë botën.

Më shumë se 19 shtete amerikane kanë legalizuar tani kanabisin rekreativ, së bashku me Kanadanë, Meksikën, Uruguain dhe të tjerë.

Në Evropë, Luksemburgu lejon konsumimin e kanabisit të kultivuar personalisht, ndërsa Zvicra po provon shitjet e kanabisit nga farmacitë për qëllime rekreative.

Malajzia dhe Tajlanda kanë bërë hapat fillestarë drejt legalizimit të përdorimit rekreativ. Kosta Rika dhe Maroku kanë miratuar gjithashtu legalizimin për qëllime mjekësore.

Edhe Shqipëria ka bërë hapa drejt legalizimit të kanabisit, ku, bazuar te rezultatet e Këshillimit Kombëtar mbi legalizimin apo jo të kanabisit për përdorim mjekësor, 61 për qind e shqiptarëve janë shprehur pro lejimit të kultivimit dhe kundër ishin vetëm 29 për qind e qytetarëve.

Rreziqet për turistët

Megjithatë, pak vende e kanë sqaruar ligjshmërinë e përdorimit të kanabisit nga turistët me legjislacionin që synon përdorimin rekreativ nga banorët.

Kjo do të thotë se turistët rrezikojnë të shkelin ligjin pa dashje, duke ndërvepruar me tregtarët e rrugës dhe policinë, si dhe nga pasojat shëndetësore të konsumimit të drogave të vërteta dhe të rreme.

Ka disa prova që kanabisi mund të përmirësojë disa kushte të shëndetit mendor dhe të sigurojë lehtësim dhimbjeje.

Por turistët me çrregullime para-ekzistuese të shëndetit mendor, për shembull, mund të rrezikojnë mirëqenien e tyre fizike dhe psikologjike.

Ngjarjet e shëndetit mendor të lidhura me kanabisin, duke përfshirë depresionin, mund të ndodhin gjithashtu tek ata që nuk janë diagnostikuar me probleme të shëndetit mendor.

Ndërsa Uruguai po planifikon të lejojë konsumimin nga turistët, vende si Portugalia, ku kanabisi është dekriminalizuar që nga viti 2001, ende nuk i lejojnë ata ta blejnë në mënyrë të ligjshme.

Në Spanjë, klubet e kanabisit lejojnë vizitorët të dhurojnë për klubin në vend që ta blejnë si produkt.

Por Spanja dhe tregje të tjera të mëdha, si Afrika e Jugut, janë më të përqendruara në turizmin vendas të kanabisit dhe jo te vizitorët ndërkombëtarë.

Pak vende kanë kryer një analizë kosto-përfitim rreth kanabisit ligjor. Ndërsa turizmi i kanabisit mund të gjenerojë turizëm, vende pune dhe të zvogëlojë fuqinë e krimit të organizuar, qëllimi i zhvillimit të qëndrueshëm kërcënohet nga vjedhja, racizmi dhe një treg i grumbulluar kundër operatorëve të vegjël vendas, të cilët shpesh nuk mund të sigurojnë fonde ose sigurime.

Ka gjithashtu rritje të mundshme të ndotjes dhe shqetësimeve për shëndetin dhe sigurinë publike.

Rreziqet e perceptuara mund të zbehen dhe faji i turistit mund të zhduket dhe turizmi i kanabisit ka të ngjarë të bëhet vetëm një segment tjetër i industrisë së pushimeve.

Marrë nga The Conversation, përshtatur për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.