Truss ‘afron’ Britaninë me BE-në – Franca do t’i tregojë Shqipërisë e Kosovës se nuk kanë nevojë për Kinën e Rusinë

Me pranimin për të marrë pjesë në një takim në bazë të konceptit të Komunitetit Politik Evropian, i cili do të zhvillohet të enjten në Pragë të Republikës Çeke, kryeministrja e re britanike, Liz Truss, po afron jo vetëm Britaninë e Madhe me Francën, por (sërish) edhe me Bashkimin Evropian.

Takimi pan-evropian ka për synim kryesor të rrisë dialogun politik dhe bashkëpunimin e shteteve në adresimin e çështjeve me interes të përbashkët.

Por, njëkohësisht, ka për qëllim edhe t’i japë një frymë të re rajonit të Ballkanit Perëndimor, duke qenë se perspektiva evropiane e vendeve, e ka nisur rrugëtimin, por sërish me hapa tepër të ngadaltë.

Me 27 liderë të vendeve të BE-së dhe 17 liderë nga pjesa tjetër e kontinentin, përfshi Britaninë e Madhe, prej dy vitesh jashtë “euros”, samiti do të japë gjithë këndvështrimin e ri të një vizioni përtej unionit.

Vetë vendimi i Truss për të qenë pjesë e takimit, është cilësuar si një mesazh i qartë për dy aspekte: Afrimi i radhës i Britanisë së Madhe me BE-në dhe zhvendosja e problemeve të brendshme të ishullit, drejt një plani më të madh.

Një praktikë tepër pragmatike, kjo e ndjekura nga Londra.

Mirëpo nga ana tjetër, për agjencinë e lajmeve “Reuters”, një zyrtar i lartë francez, ka thënë se takimi, zhvillohet edhe për t’i treguar Shqipërisë dhe Kosovës, se Evropa mund të bëjë shumë për ta, ndaj sytë nuk duhen kthyer nga Kina dhe Rusia.

Fakti se referimi i zyrtarit nga Elysee-ja reflekton vetëm Shqipërinë dhe Kosovën në deklaratë, nënkupton se ka një vëmendje të shtuar ndaj dy vendeve, përtej tablosë së përgjithshme rajonale.

Presidenti francez, Emmanuel Macron, i cili nga ana tjetër është edhe propozuesi madhor i nismës së Komunitetit Politik Evropian, e ka bërë të qartë shqetësimin se negociatat mes unionit dhe vendeve të Ballkanit Perëndimor, janë të gjata dhe mund të dekurajojnë këto vende në rrugën drejt anëtarësimit.

Ndaj, për këtë arsye, shihet edhe si qartësisht e domosdoshme, t’i tregohet faktorëve rajonalë, se Evropa është realisht aty dhe Ballkani, është pjesë e patjetërsueshme e saj.

Do të arrijë ta mposhtë kështu euroskepticizmin Macron? Apo përafrimi do të jetë thjesht kolateral?

Çfarë ka në agjendën e samitit?

Është zbuluar edhe agjenda e parë e takimit të Komunitetit Politik Evropian, e cila parasheh që të bëjë bashkë liderët nga i gjithë kontinenti të përbashkuar rreth një qëllimi me 6 tetor në Pragë.

Sipas asaj që është prezantuar deri tani, Komuniteti Politik Evropian, kërkon që ta rris dialogun politik dhe bashkëpunimin e shteteve në adresimin e çështjeve me interes të përbashkët.

Gjithashtu, synim është forcimi i sigurisë, stabilitetit dhe prosperiteti i kontinentit evropian.

Kjo platformë për koordinim politik nuk është replikim i asnjë organizimi tjetër, as për nga mbarëvajtja as për nga struktura dhe as nuk provon të krijojë një mekanizëm të ri të përhershëm në këtë fazë, thuhet në njoftimin që ka lëshuar Këshilli Evropian.

Në takim, përveç 27 shteteve të BE-së, do të jenë të pranishëm edhe përfaqësues të 17 shteteve të tjera evropiane, përfshirë këtu edhe Shqipërinë e Kosovën.

Në agjendë parashihet që të ketë një tabelë të rrumbullakët edhe për “paqen dhe sigurinë” dhe pika të tjera do jenë edhe “energjia, klima dhe situata ekonomike”.

Në agjendën parashihen edhe takime bilaterale të shteteve.

Në fund, do të ketë edhe një konferencë të përbashkët të organizatorëve.

A është ‘Komuniteti Politik Evropian’ i Macron-it një perspektivë realiste?

Një strukturë jashtë BE-së për Ballkanin Perëndimor, flet kryekorrespondenti i ‘Politico’ për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.