Trump rrezikon të dëbohet nga salla e gjyqit, akuzon gjyqtarin si ‘person armiqësor’

Shkëndijat e para nisën në sallën e gjyqit, në gjykatën e Manhatanit.

Atje, Donald Trump po përballet për herë të dytë me një gjyq civil për shpifje, pasi e cilësoi shkrimtaren Jean Carroll, e cila e kishte akuzuar për një sulm seksual, si “gënjeshtare” dhe “mashtruese”.

Tashmë ai e ka marrë një dënim për të paguar më shumë se pesë milionë dollarë në gjyqin e parë, por më pas ish-presidenti i përsëriti akuzat në CNN.

Kështu, Carroll vendosi ta padisë përsëri dhe këtë herë t’i kërkonte dhjetë milionë.

Gjatë seancës, pasi akuzuesi kishte dëshmuar, një nga avokatët e shkrimtares u ankua te gjyqtari se kishte dëgjuar komentet e bëra me zë të lartë nga Trump.

Sipas tij, ai kishte folur për një “gjueti shtrigash” dhe kishte thënë se është “një mashtrim”, “janë thjesht gënjeshtra”.

Gjyqtari Lewis Kaplan humbi durimin.

“Trump ka të drejtë të jetë i pranishëm këtu, por kjo e drejtë mund të humbasë nëse ai shqetëson, gjë që më raportohet mua, dhe nëse sillet në mënyrë mosrespektuese ndaj gjykatës”, deklaroi ai, duke iu drejtuar avokatëve të Trump.

Më pas Kaplan iu drejtua drejtpërsëdrejti: “Trump, shpresoj se nuk duhet të mendoj të të përjashtoj nga gjyqi”.

Trump, i cili e kishte kaluar të gjithë seancën duke tundur kokën në mënyrë dramatike, u përgjigj: “Do të doja ta bëje”.

“Unë e kuptoj”, u përgjigj gjyqtari, “se ju ndoshta do të dëshironit vërtet që unë ta bëja këtë sepse nuk jeni vërtet në gjendje të kontrolloni veten”.

Por konflikti nuk përfundoi me kaq.

Duke u larguar nga salla e gjyqit, Trump ofendoi gjyqtarin, duke e quajtur atë një “urryes radikal të Trumpit”.

“Ai është një gjyqtar i pakëndshëm, ai është një nga djemtë që e urrejnë Trumpin. Duket e qartë për të gjithë në gjykatë. Sinqerisht, kjo që po ndodh është një turp”.

Gjatë gjyqit, ai gjeti kohë për të postuar ofendime dhe akuza për të Vërtetën, duke e cilësuar gjyqin “korruptiv” dhe “ndërhyrje në zgjedhje”.

Më pas, duke iu referuar Carroll-it, ai tha se është “një person për të cilin nuk e kisha idenë derisa ndodhi kjo gjë, natyrisht, nuk e kam idenë se kush ishte dhe nuk mund të më interesonte më pak”.

Më pas, në një tufë të re postimesh, akuzoi, pa treguar prova, gjyqtarin se “e ka mbrojtur atë”, e përkufizoi atë se “vuan nga sindroma e çrregullimit Trump”.

Po ashtu akuzoi gjyqtarin se e pengoi të mbrohet.

Trump u nis për në New Hampshire për të bërë fushatë për zgjedhjet paraprake të planifikuara për javën e ardhshme, por ky angazhim nuk e ka larguar vëmendjen e tij.

Ai e quajti gjyqtarin “të njëanshëm” dhe “person armiqësor”.

“I gjithë sistemi i New York-ut është i korruptuar dhe është kundër meje për faktin se unë jam i vetmi ish-president republikan, por edhe kandidati kryesor, ai që po mposht shumë të korruptuarin Joe Biden”.

“Ky rast është një shembull tjetër i ndërhyrjes zgjedhore në nivele të paparë më parë. Avokati i Jean Carroll është gjithashtu një shërbëtor politik i demokratëve dhe i gjithë ky mashtrim është krijuar dhe konceptuar nga Reid Hoffman, George Conway dhe shumë të tjerë që janë pjesë e sistemit të banditëve demokratë”.

Hoffman është bashkëthemeluesi miliarder i Linkedin, i cili financoi tarifat ligjore të Carroll për gjyqin e parë.

Kurse avokati Conway është ish-bashkëshorti i Kellyanne Connway, gruaja që punoi për Trump gjatë presidencës së tij.

Marrë nga “La Repubblica”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.