Trump-i, pozitiv me COVID disa ditë përpara debatit me Biden-in

Ish-presidenti amerikan, Donald Trump, ka rezultuar pozitiv me COVID-19 tre ditë përpara debatit të tij të parë kundër presidentit aktual, Joe Biden.

Kështu ka zbuluar në një libër të ri, shefi i katërt dhe i fundit i kabinetit të ish-presidentit Trump, Mark Meadows, tregon agjencia e lajmeve “The Guardian”.

Madje, ai nuk ka hezituar të tregojë në libër se, megjithëse e dinte se secili kandidat duhet të rezultonte negativ brenda 72 orëve nga koha e nisjes, “asgjë nuk do ta ndalte Trump-in të dilte atje”.

Zbulimi i Meadows për testin pozitiv të pa raportuar, pason një vit spekulimesh nëse Trump-i, asokohe 74 vjeç, ishte mbartës i virusit kur u përball me Biden-in, në Cleveland më 29 shtator.

Ndërkaq, ish-presidenti raportoi ditë më vonë për këtë, më 2 tetor.

Në atë kohë, Shtëpia e Bardhë deklaroi se ai e shpalli rezultatin brenda një ore nga marrja e tij. Dhe po atë ditë, Trump-i u nis drejt spitalit.

Me titullin “The Chief’s Chief”, libri me kujtime i Meadows, do të publikohen javën e ardhshme nga All Seasons Press, shtëpi botuese konservatore.

Në libër, Meadows ka treguar se testi pozitiv i 26 shtatorit ishte një tronditje për një Shtëpi të Bardhë, e cila sapo kishte organizuar një ceremoni triumfuese të Kopshtit të Trëndafilave për kandidaten e gjykatës supreme, Amy Coney Barrett.

Kjo e fundit, tanimë, përflitet si një ngjarje “super-përhapëse” e infektimeve me COVID-19.

Sipas Meadows, testi pozitiv ishte bërë me një model të vjetër. Kështu, i ka thënë Trump-it se testi do të përsëritej me “sistemin Binax dhe se shpresonim që testi i parë të ishte një pozitiv i rremë”.

Pas “një pritjeje të shkurtër, por të tensionuar”, Meadows u kthye me lajmin për testin negativ.

Këtë përgjigje të dytë, ish-presidenti e mori si “leje të plotë për të vazhduar sikur të mos kishte ndodhur asgjë”. Megjithatë, shefi i tij i shtabit, “udhëzoi të gjithë në rrethin e tij të ngushtë që ta trajtonin atë sikur të ishte pozitiv”.

“Nuk doja të ndërmerrja ndonjë rrezik të panevojshëm, as nuk doja të alarmoja publikun se nuk kishte asgjë për t’u shqetësuar, gjë që sipas testit të ri, shumë më të saktë, nuk kishte”, ka shkruar Meadows në libër.

Në ditën e debatit, më 29 shtator, Trump-i dukej mirë, ka treguar ai.

“Fytyra e tij kishte rifituar ngjyrën e saj të zakonshme, por rrathët e zinj poshtë syve i ishin thelluar. Teksa ecnim në lokal rreth orës pesë të mbrëmjes, mund të dalloja se ai po lëvizte më ngadalë se zakonisht. Ai ecte sikur mbante një peshë shtesë në shpinë”, ka vijuar autori.

Megjithatë, Trump-i hyri në debat dhe dha një performancë të furishme dhe të diskutueshme.

Dhe tre ditë më vonë, më 2 tetor, ai njoftoi përmes një postimi në platformën Twitter se ai dhe gruaja e tij, Melania Trump, ishin pozitivë me COVID.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.