Trump e rriti, Biden ul tarifën e importit të çelikut nga Japonia

SHBA-të dhe Japonia kanë rënë dakord të heqin tarifat e kohës së ish-presidentit republikan Donald Trump nga rreth 1.25 milionë tonë metrikë në vit të importeve japoneze të çelikut.

Sipas marrëveshjes, Japonia do të ndihmojë në trajtimin e furnizimeve të tepërta të çelikut, të cilat ulin çmimet.

Marrëveshja synon të eliminojë “praktikat e padrejta” në industrinë globale të çelikut, e cila dominohet nga Kina.

Administrata e presidentit amerikan, Joe Biden, tashmë ka bërë një marrëveshje të ngjashme me BE-në, por tarifat mbeten në fuqi për importet në Mbretërinë e Bashkuar.

Marrëveshja me Japoninë, e cila hyn në fuqi më 1 prill “do të na ndihmojë më tej të rindërtojmë marrëdhëniet me aleatët tanë në mbarë botën, ndërsa punojmë për të luftuar kundër praktikave të padrejta tregtare të Kinës”, tha sekretarja e Tregtisë e SHBA-ve, Gina Raimondo.

Gjatë presidencës së Trump-it, Washington-i vendosi tarifa për një numër vendesh, duke përmendur importet e lira të metaleve si një kërcënim për sigurinë kombëtare.

Sipas marrëveshjes së re, SHBA-të do të ndalojnë tarifimin prej 25% për importet japoneze të çelikut, duke përjashtuar aluminin, deri në një prag vjetor prej 1.25 milionë ton metrikë.

Ndërkohë, Tokyo tha se do të ndërmarrë hapa brenda gjashtë muajve për të mbështetur atë që SHBA-të dhe Japonia e shohin si një treg me të drejtë çeliku.

Këto përfshijnë taksimin e mallrave që besohet se kanë çmim nën vlerën e tregut dhe një taksë për të kompensuar subvencionet që ka marrë një eksportues.

Njoftimi u mirëprit me kujdes nga ekspertët e investimeve.

Më 1 janar, hyri në fuqi një marrëveshje midis Brukselit dhe Washington-it, e cila lejon eksportet pa tarifa të çelikut dhe aluminit të BE-së në SHBA.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.