Shqipëria

Trinomi ‘media, politikë, shikues’ në Shqipëri


Kur shqiptarët i ndan edhe një javë nga zgjedhjet parlamentare, 25 prill 2021, sipas Autoritetit të Medias Audiovizve (AMA), vihet re një rritje e shikueshmërisë së emisioneve politike.

AMA, e cila merret me monitorimin e gjithë mediave në Shqipëri, për Albanian Post (AP) rrëfen se “emisionet politike janë më të ndjekurat në Shqipëri, sidomos në kohë fushate”.

Gjithashtu, Autoriteti shprehet se kurba e audiencës pëson një rritje, kryesisht gjatë mbrëmjeve.

Emision politik apo diçka tjetër?

Pothuajse çdo mbrëmje, gazetarë, analistë, mjekë, politikanë apo personazhe të tjera qëndrojnë përballë njëri-tjetrit për të diskutuar rreth një teme të caktuar.

Por, çfarë zgjedhin shqiptarët?

Sipas Enio Civicit, drejtor informacioni, për Albanian Post, thotë se emisionet që i përkasin politikës ndiqen nga një numër i lartë njerëzish.

“Shqiptarët janë shumë të lidhur me politikën. Për shqiptarët, futbolli dhe politika ndiqen me të njëjtën frymë, pavarësisht se janë dy çështje shumë-shumë të largëta”.

Për të realizuar në perfeksion detyrën e gazetarit, sidomos gjatë periudhës së fushatës elektorale, pothuajse 70% e kolegëve, sipas tij, ndjekin nismat dhe debatet politike.

Enio ndalet edhe te roli i medias në përcjelljen e informacioneve.

Sipas tij, “roli i medias është jashtëzakonisht i rëndësishëm në bindjet politike. Kjo, pasi pjesa më e madhe e informacionit arrin te qytetarët nëpërmjet saj”.

Sipas autorëve Karol Jakubowicz dhe Miklos Sukosd: “ajo që e dallon dinamikën historike të regjimeve postkomuniste, nga llojet e tjera të regjimeve është ndikimi i madh i kërkesës politike. Pavarësisht nga mosha, gjinia apo pozicioni në shoqëri, media pa dyshim ka një rol ndikues”.

Ina Zoga, specialiste marketingu, flet për shikueshmërinë e emisioneve politike. Për AP-në ajo thotë që “emisionet politike thyejnë rekorde në krahasim me emisionet e tjera”.

Instituti Shqiptar i Medias, në një studim të vitit 2019, ka arritur në përfundimin se lajmet që i përkasin politikës zënë një përqindje më të lartë të shikueshmërisë, më shumë se 45 për qind.

Alfred Lela, specialist i medias, gjithashtu tregon për AP-në se “shqiptarët janë shumë të lidhur me politikën edhe kur thonë se nuk ju intereson”.

Në vijim, ai thekson faktin se audencia më e lartë shkon për politikën në krahasim kur diskutohen tematika të tjera.

“Në bisedat më të zakonshme dhe me njerëz që sapo i ke takuar, biseda gjithmonë devijohet kah politikës”.

Në fund, Lela thotë se “sa i përket audiencës, varet nga temat dhe çështjet. Ndjekje më të lartë, mund të them, që kanë personazhet kontroverse”.

/Albanianpost.com


Lajmet kryesore