Në shtetin qendror të Indisë, Madhya Pradesh, një zyrtar shëndetësor po hetohet për vaksinimin e 30 nxënësve me një shiringë të vetme.
Ngjarja ka ndodhur në një shkollë në distriktin Sagar ku fëmijëve u jepeshin vaksinat kundër COVID-19.
Ministria e atjeshme e Shëndetësisë mandaton një protokoll “një gjilpërë, një shiringë, vetëm një herë” për vaksinat COVID-19.
India ka administruar mbi 2.03 miliardë vaksina të tilla deri më tani.
Shiringat njëpërdorimshe përdoren gjerësisht në Indi për të shmangur përhapjen e sëmundjeve vdekjeprurëse.
Megjithatë, ka pasur incidente të shumta në të kaluarën ku një shiringë e vetme është ripërdorur në spitale për shkak të mungesës së tyre.
Jitendra Rai, i cili po vaksinonte fëmijët, ka treguar për mediat se atij i ishte dhënë vetëm një shiringë nga departamenti i shëndetësisë dhe ai thjesht po zbatonte urdhrat.
Prindërit që kishin shoqëruar fëmijët e tyre e vunë re këtë çështje dhe e raportuan tek autoritetet e shkollës.
Kur zyrtarët shtetërorë arritën në shkollë, Rai mungonte dhe telefoni i tij ishte i fikur.
Drejtoria e Shëndetësisë ka regjistruar ndaj tij një rast nga pakujdesia. Ndërkohë, ka nisur një hetim edhe ndaj zyrtarit përgjegjës për dërgimin e pajisjeve për aksionin e vaksinimit.
India është vendi i dytë pas Kinës që ka kaluar kufirin e dy miliardë vaksinave kundër COVID-it.
Në korrik, qeveria njoftoi një program 75-ditor falas të dozës përforcuese të për të gjithë të rriturit.
Ndërkaq, 98 për qind e të rriturve kanë marrë të paktën një dozë të vaksinës dhe 90 për qind janë vaksinuar plotësisht.
Marrë nga “BBC”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
