Trajkoviç: Flamuri i Kosovës në komunat në Veri është rezultat i një politike katastrofike të Vuçiç-it

Rada Trajkoviç, kryetare e Lëvizjes Evropiane të serbëve të Kosovës dhe këshilltare politike e ministrit të për Komunitete dhe Kthim, Nenad Rashiç, këtë të premte, u ka bërë thirrje serbëve që jetojnë në Kosovë për të mos i shkuar prapa presidentit të Serbisë, Aleksandër Vuçiç, pasi që sipas saj edhe vendosja e flamurit të Kosovës në objektin e Komunës së Mitrovicës së Veriut, pas betimit të kryetarit të ri, Erden Atiq, ishte si rezultat i politikës së Serbisë.

“Të dashur serbë të veriut, mos lejoni që t’ju instrumentalizojnë përsëri sepse u është lëkundur pushteti në Beograd. Flamuri i ri në komunat tuaja është VETËM rezultat i politikës së tij katastrofike”, ka thënë Trajkoviç.

Ndërkaq, ajo potencoi se “nëse mbështeteni tek ai për mbijetesë, dhe e ndiqni atë në konflikt, ne nuk kemi të ardhme në Kosovë”.

Ndryshe, Erden Atiq nga radhët e Lëvizjes Vetëvendosjes është betuar si kryetar i ri i Komunës së Mitrovicës së Veriut.

Në seancën solemne të organizuar në sallën e Kuvendit Komunal në Mitrovicën e Veriut, Atiq dha betimin para asamblistëve të komunës.

“Unë Erden Atiq betohem se si kryetar i Komunës së Mitrovicës së Veriut do të kryejë detyrat në mënyrë të paanshme, me ndërgjegje dhe në përputhje me ligjin, në mënyrë që t’i siguroj kushtet për një jetë të qetë”, tha Atiq.

Vendimi i parë i Atiq si kryetar komune ishte emërimi i Katarina Agjançiç si nënkryetare e tij.

Pas fjalimit të shkurtër në sallën e Kuvendit Komunal, Atiq foli për medie, në korridor të objektit të Komunës.

“Sapo e përfunduam seancën solemne, dua të jap dy mesazhe të shkurta, për të gjithë”, tha ai.

“Ne me të gjithë ekipin dhe unë si kryetar komune, shprehem se do të punoj për të gjithë qytetarët e Komunës së Mitrovicës, pa dallim e pa diskriminim. Angazhimin më të madh do ta bëj për ta normalizuar këtë pjesë të komunës dhe i bëj ftesë të gjithë qytetarëve që të vijnë të na takojnë e të na vizitojnë e të bashkëpunojmë, sa më mirë, për të mirën e tyre, qytetarëve”, deklaroi kryetari i ri i Mitrovicës së Veriut.

“Unë këtu jam edhe me nënkryetaren e komunës, Katarina Agjanqiç, kemi për të punuar bashkë me një ekipë shumë dinamike, shumë shpresëdhënëse, gjithashtu me ne është edhe ministri i Ministrisë së Administrimit të Pushtetit Lokal, Elbert Krasniqi, me ne është edhe kryesuesi i kuvendit Komunal”, shtoi Atiq.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.