Tragjedia në Uvalde: Shkarkohet shefi i policisë Pete Arredondo

Një shef policie i akuzuar për dështimin e reagimit ndaj të shtënave fatale kundrejt 19 nxënësve dhe dy mësuesve në Uvalde të Texas-it, është shkarkuar.

Bordi i shkollës lokale votoi unanimisht për shkarkimin e Pete Arredondo, i cili kishte qenë në pezullim që nga qershori.

Sipas avokatëve të tij, ai nuk kishte qenë në dijeni se sulmuesi ishte brenda klasave.

Shkarkimi i tij ka ardhur tre muaj nga dita e sulmit dhe dy javë para fillimit të semestrit të ri shkollor.

Sulmi në shkollën fillore Robb më 24 maj ishte sulmi më vdekjeprurës në një shkollë të SHBA-ve në gati një dekadë.

Shumë prindër dhe të afërm kanë shprehur zemërim të thellë për reagimin e policisë dhe ka pasur presione në rritje që forcat e rendit të mbajnë përgjegjësi.

Arredondo ka marrë pjesën më të madhe të kritikave për vonesën prej 77 minutash të oficerëve në përballjen me adoleshentin e armatosur dhe është oficeri i parë që shkarkohet.

Në auditor u dëgjuan brohoritjet teksa bordi i besuar i Distriktit të Pavarur të Shkollës së Konsoliduar të Uvalde paraqiti mocionin për ta hequr atë nga posti i tij menjëherë.

Avokatët e Arredondo e kanë quajtur atë “një oficer me kurajo” dhe shkarkimin e tij “një linçim publik antikushtetues”.

Po ashtu kanë thënë se klienti i tyre nuk mendonte se ai ishte zyrtari përgjegjës në kohën e sulmit.

“Çdo pretendim për mungesë lidershipi është krejtësisht i gabuar”, sipas tyre.

Nga ana tjetër, zyrtarët e shkollës kanë thënë se nxënësit nuk do të kthehen në shkollën fillore Robb kur të fillojë mësimi më 6 shtator.

Në vend të kësaj do të pajisen me klasa të përkohshme diku tjetër në Uvalde ose shkollë virtuale.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.