Tirana ka bërë një hap të madh drejt titullit kampion duke regjistruar fitoren e katërt radhazi në stadiumin “Loro Boriçi” kundër Vllaznisë.
Edhe pse një “Klasike” me shumë yje në fushë për të dyja skuadrat, loja nuk pati shumë raste dhe shkëlqim përgjatë 97 minutave.
Ndeshja u zhbllokua në minutën e 43-të me një aksion të shpejtë nga krahu i majtë me protagonist Kristal Abazajn.
Ai e gjeti të pavendosur mbrojtjen dhe shënoi golin e avantazhit falë edhe një devijimi të Bulatoviç-it.
Sulmuesi rigjen nuhatjen me golin pas dopietës kundër Egnatias, por ende vuan një formë jo të mirë fizike.
“Fitore e rëndësishme dhe fitore karakteri. Jam i kënaqur nga shpirti i garës, kjo është e rëndësishme në këtë fazë”, theksoi trajneri bardheblu Orges Shehi për Oversport në fund të garës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
