Threads – ‘vrasësi i Twitter-it’ – ka mbërritur

Pas muajsh spekulimesh, aplikacioni i përfolur prej kohësh i Mark Zuckerberg ka mbërritur.

Threads, u zbulua si një shoqërues i Instagram-it, që kompania Meta e Zuckerberg-ut bleu më shumë se një dekadë më parë.

Por pritet që aplikacioni i ri të zëvendësojë rivalin Twitter, ndaj i referohen shumë si “vrasës i Twitter-it”.

Shpërndaja e Threads rrit rivalitetin midis Zuckerberg-ut dhe Elon Musk-ut, i cili bleu Twitter-in vitin e kaluar.

Musk ka ndryshuar përvojën e Twitter-it duke ndërhyrë me algoritmin e tij dhe veçoritë e tjera.

Së fundmi ka vendosur kufizime të përkohshme në numrin e tweet-eve që njerëzit mund të lexojnë kur përdorin aplikacionin, duke nxitur zemërim.

Ndërkohë, një sërë kompanish të teknologjisë janë përpjekur të përfitojnë nga trazirat e Twitter-iy në muajt e fundit.

Por Threads ka një nisje të mirë, të mbështetur nga xhepat e thellë të Meta-s dhe baza e madhe e përdoruesve të Instagram-it prej më shumë se dy miliardë përdorues aktivë mujorë në mbarë botën.

“Mendoj se duhet të ketë një aplikacion për biseda publike me 1 miliard+ njerëz në të. Twitter ka pasur mundësinë për ta bërë këtë, por nuk e ka arritur. Shpresojmë se do ta bëjmë”, ka thënë Zuckerberg.

Sipas tij, Threads arriti 10 milionë regjistrime brenda shtatë orëve nga fillimi i tij.

Kurse Musk është shprehur se nuk i ka bërë përshtypje Threads dhe ka pretenduar se kishte anuluar llogarinë e tij në Instagram.

“Është pafundësisht e preferueshme të sulmohesh nga të huajt në Twitter, sesa të kënaqesh me lumturinë e rreme të Instagram-it”, ka thënë ai.

Çfarë është Threads dhe si funksionon?

Krijuar nga Instagram-i, Threads pozicionohet si një aplikacion ku njerëzit mund të kenë biseda publike në kohë reale me njëri-tjetrin.

Gjithashtu ndihmon në rritjen e Instagram-it, i cili është një aplikacion në familjen e produkteve Meta.

“Ideja është që të shpresojmë të ndërtojmë një hapësirë të hapur, miqësore për komunitetet”, ka treguar Adam Mosseri, kreu i Instagram.

Ata që janë të interesuar të regjistrohen në aplikacionin e ri duhet të kenë një llogari në Instagram.

Dhe njerëzit do të jenë në gjendje të importojnë drejtpërdrejt listën e atyre që ndjekin në Instagram në Threads nëse dëshirojnë.

Përdoruesit e verifikuar të Instagram-it do të verifikohen gjithashtu në aplikacionin e ri. Përdoruesit mund të vendosin që llogaria e tyre Threads të jetë private ose publike.

Si është Threads kundrejt Twitter-it?

Threads duket thuajse identik me Twitter-in në shumë mënyra.

Përdoruesit mund të postojnë kryesisht mesazhe të bazuara në tekst, ku njerëzit që i ndjekin dhe që ndjekin mund të përgjigjen.

Njerëzit gjithashtu mund të postojnë foto ose video në aplikacion.

Por Threads është gjithashtu i ndryshëm nga Twitter-i.

Aktualisht nuk mbështet mesazhe direkte, një veçori që ofron Twitter-i.

Sakaq, Instagram-i ka thënë se mund të shtojë veçori në Threads nëse përdoruesit e rinj i kërkojnë ato.

Si doli Instagram-i me Threads?

Instagram-i ka bërë një përpjekje të përbashkët për të thjeshtuar aplikacionin e tij gjatë viteve të fundit, sipas Mosseri-t.

Si pjesë e kësaj përpjekjeje, Threads u shpërnda në një aplikacion të veçantë.

Në këtë mënyrë, Instagram-i nuk do të ishte shumë i rrëmujshëm duke u përpjekur që bisedat publike të funksionojnë brenda aplikacionit ekzistues.

Sipas tij, zgjedhja për të krijuar një aplikacion të ri ishte gjithashtu e vështirë për t’i rezistuar, veçanërisht në një moment të trazuar në peizazhin e mediave sociale.

“Kishte një mundësi apo kërkesë që më shumë njerëz të luanin në hapësirën publike”, ka thënë ai, duke iu referuar ndryshimeve të Twitter-it nën drejtimin e Musk.

Mosseri ka shtuar se shansi për të sfiduar Twitter-in erdhi “jo vetëm për shkak të pronësisë, por për shkak të ndryshimeve të produktit dhe vendimeve” që Musk dhe të tjerët morën për mënyrën se si funksionon platforma sociale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.