Lajme

Themeluesi i WikiLeaks fiton fazën e parë të përpjekjes për të apeluar ekstradimin në SHBA


Julian Assange, themeluesi i WikiLeaks, ka fituar fazën e parë të përpjekjes për të përmbysur një vendim të Mbretërisë së Bashkuar që hapi derën për ekstradimin e tij në SHBA.

Kjo, për të dalë në gjyq për akuzat e spiunazhit.

Agjencia “Associated Press” tregon se Gjykata e Lartë në Londër i dha atij lejen për të apeluar çështjen në Gjykatën e Lartë të Mbretërisë së Bashkuar.

Mirëpo, Gjykata e Lartë duhet fillimisht ta pranojë çështjen.

“Ne fituam sot në gjykatë.. do të luftojmë derisa Julian të jetë i lirë”, ka thënë e fejuara Stella Moris.

Zakonisht, Gjykatës së Lartë i duhen afro tetë javë pas paraqitjes së një aplikimi për të vendosur nëse do të pranohet.

Vendimi është hapi i fundit në betejën e gjatë të Assange për të shmangur një gjyq në SHBA për një sërë akuzash që lidhen me publikimin e dokumenteve të klasifikuara nga WikiLeaks më shumë se një dekadë më parë.

Një gjykatës i gjykatës në Londër, më shumë se një vit më parë, refuzoi një kërkesë të SHBA-ve për ekstradim me arsyetimin se Assange kishte të ngjarë të vriste veten nëse mbahej në kushte të rënda burgu në SHBA.

Më vonë, autoritetet amerikane dhanë garanci se themeluesi i WikiLeaks nuk do të përballej me trajtimin e ashpër që avokatët e tij thanë se do të rrezikonte shëndetin e tij fizik dhe mendor.

Muajin e kaluar, Gjykata e Lartë e rrëzoi vendimin e gjykatës më të ulët, duke thënë se premtimet e SHBA-ve ishin të mjaftueshme për të garantuar që Assange do të trajtohej në mënyrë njerëzore.

Këto garanci ishin fokusi i vendimit të dhënë nga Gjykata e Lartë, dallon “Associated Press”.

Mirëpo, avokatët e tij kanë argumentuar se premtimi i qeverisë amerikane se Assange nuk do t’i nënshtrohet kushteve ekstreme është i pakuptimtë.

Kjo pasi është i kushtëzuar dhe mund të ndryshohet sipas gjykimit të autoriteteve amerikane.

SHBA-të u kanë kërkuar autoriteteve britanike ta ekstradojnë atë në mënyrë që të mund të dalë në gjyq për 17 akuza për spiunazh dhe një akuzë për keqpërdorim kompjuteri të lidhur me publikimin e mijëra dokumenteve ushtarake dhe diplomatike të zbuluara nga WikiLeaks.

50-vjeçari është mbajtur në burgun e sigurisë së lartë në Belmarsh që nga viti 2019, kur ai u arrestua për anashkalimin e lirimit me kusht gjatë një beteje të veçantë ligjore.

Para kësaj, ai ka kaluar shtatë vjet i mbyllur brenda Ambasadës së Ekuadorit në Londër. Assange kërkoi mbrojtje në ambasadë në vitin 2012 për të shmangur ekstradimin në Suedi për t’u përballur me akuzat për përdhunim dhe sulm seksual.

Në nëntor 2019, Suedia hoqi dorë nga hetimet për krimet seksuale sepse kishte kaluar shumë kohë.

Për avokatët e tij, “ai nuk duhet të përballet me ndjekje penale dhe dekada burg për publikimin e informacionit të vërtetë me rëndësi të madhe publike”.

/Albanianpost.com


Lajmet kryesore