“Thellimi i marrëdhënieve dhe bashkëpunimi në ekonomi”, temë diskutimi mes Gërvallës dhe homologut nga Malta

Ministrja e Punëve të Jashtme dhe Diasporës (MPJD), Donika Gërvalla, është takuar me homologun nga Malta, Ian Borg, me të cilin kanë diskutuar për thellimin e marrëdhënieve diplomatike dhe bashkëpunimin në ekonomi.

Takimi është bërë i ditur përmes një komunikate për media.

“Bashkëpunimi në ekonomi, shkëmbim tregtar, turizëm, shkëmbim të përvojave në qeverisje të mirë dhe proceset integruese të Kosovës, ishin temat kyçe të takimit që Zëvendëskryeministrja dhe Ministrja e Punëve të Jashtme dhe Diasporës e Republikës së Kosovës, znj. Donika Gërvalla, pati në margjinat e Konferencës së Sigurisë në Mynih me Ministrin e Punëve të Jashtme, Çështjeve Evropiane dhe Tregtisë të Maltës z. Ian Borg.”, thuhet në komunikatë.

Ajo tutje i ka thënë Borg-ut, se Kosova është duke ecur në “hapa të sigurt”.

“Gjatë takimit bilateral, Ministrja Gërvalla falënderoi homologun e saj për mbështetjen që Malta i ka dhënë Kosovës duke theksuar se shteti ynë po ecën me hapa të sigurt drejt përparimit thelbësor në përmbushjen e kritereve për anëtarësim në BE dhe NATO, duke ndërmarrë reforma të thella në ekonomi, politika zhvillimore, legjislacion, luftë kundër korrupsionit dhe progres të përgjithshëm shoqëror”.

Meqë Malta, kryeson këtë vit OSBE-në Gërvalla diskutoi edhe për bashkëpunimin në fushat që mbulon ky mekanizëm.

Kryeministri i Kosovës, Albin Kurti, së bashku me ministren e Punëve të Jashtme dhe Diasporës, Donika Gërvalla janë duke qëndruar në Munih për Konferencën e Sigurisë.

Kurti, me disa prej pjesëmarrësve ka zhvilluar diskutime edhe rreth rregullores së Bankës Qendrore të Kosovës (BQK).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.