Lajme

Tesla zgjeron uljet e çmimeve në SHBA dhe Evropë për të nxitur shitjet


Kompania Tesla ka ulur çmimet e makinave të veta elektrike në SHBA, duke zgjeruar një strategji të re të zbritjeve agresive pas mungesës së vlerësimeve të Wall Street-it për dërgesat.

Uljet e çmimeve në SHBA për sedanin Model 3 dhe SUV crossover Model Y varion midis 6 për qind dhe 20 për qind krahasuar me çmimet para zbritjes.

Po ashtu Tesla ka ulur çmimet për SUV-në e saj luksoz Model X dhe sedanin Model S në SHBA.

Kurse në Gjermani, kompania ka ulur çmimet për Model 3 dhe Model Y  me rreth 1 për qind dhe pothuajse 17 për qind në varësi të konfigurimit.

Gjithashtu ka ulur çmimet në Austri, Zvicër dhe Francë.

Për një blerës amerikan të makinës Model Y, çmimi i ri i kombinuar me subvencionin e SHBA-ve që ka hyrë në fuqi këtë muaj arrin në një zbritje prej 31 për qind.

Bashkë me uljet e çmimeve të shpallura javën e kaluar në Kinë dhe tregje të tjera aziatike, lëvizja shënon një ndryshim në tregjet më të mëdha të Tesla-s nga strategjia që ka ndjekur gjatë pjesës më të madhe të vitit 2022.

Atë vit kërkesa ishte e fortë dhe çmimet mesatare të shitjes për automjetet e saj elektrike ishin në trend më të larta.

Megjithatë, disa përdorues në forumet e fansave të Tesla-s janë ankuar se ulja e çmimeve u ka shkaktuar probleme klientëve që kanë blerë kohët e fundit automjetin e tyre, duke i lënë ata me një artikull me vlerë më të ulët në tregun e makinave të përdorura.

Në Kinë, ku Tesla ka ulur çmimet javën e kaluar me 6 deri në 13.5 për qind, pronarët protestuan në qendrat e shpërndarjes në të gjithë vendin, duke i kërkuar Tesla-s kompensim.

Përpara uljes së çmimit, inventari i Tesla-s në SHBA ka qenë në trend më të lartë.

Çmimet e modeleve të përdorura të Tesla-s kanë qenë gjithashtu në rënie, duke rritur presionin mbi të për të rregulluar çmimet e makinave të reja.

Sakaq, ky ndryshim është lëvizja e parë e madhe nga Tesla që kur ka emëruar drejtuesin e vet ekzekutiv për Kinën dhe Azinë, Tom Zhu, për të mbikëqyrur prodhimin dhe shitjet në SHBA.

Sipas analistëve, ulja e çmimeve në Kinë do të rrisë kërkesën dhe presionin mbi rivalët e saj atje për të ndjekur shembullin në atë që mund të shndërrohej në një luftë çmimesh në tregun më të madh të vetëm për automjetet elektrike.

Dhe ky presion mund të rritet edhe në Evropë.

Marrë nga “Reuters”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore