Televizioni rus përgatit popullin për luftë: NATO të sprapset ose do të ushtrojmë forcë, sovraniteti i Ukrainës s’është i garantuar

Histeria dhe hiperbolat anti-Perëndimore në televizionet kombëtare ruse nuk mungojnë, por vëmendjen e vërtetë e ka rrokur një prezantuese e një emisioni debati në kanalin Russia 1, ku përtej koreve nacionaliste, ajo kërcënon se NATO duhet të sprapset vullnetarisht, ose do të jenë rusët, ata të cilët do t’i përzënë me forcë, duke iu referuar çështjes së Ukrainës.

Pikërisht mbi këtë të fundit, ajo thekson se sovraniteti i Kievit, “nuk është i garantuar”.

Këtë fakt e raporton ish-gazetari i të përditshmes amerikane “The New York Times” dhe gazetari i Radio Evropa e Lirë në Moskë, Matthew Luxmoore.

Nëpërmjet një postimi në Twitter, ai ka shpërndarë në rrjet videon e prezantueses ruse, e cila ka përdorur atë gjuhë. Shqetësimi që Luxmoore ngre, është ai i një konfliktimi të vërtetë ushtarak, mes forcave të NATO-s dhe Moskës.

Hard to not view this as Russia priming its population for war.

“Russia placed the US in a Catch-22. Either they step back voluntarily or we’ll make them do it by force. And we make no guarantees about Ukraine’s sovereignty… Maybe we really are on the verge of war with NATO.” pic.twitter.com/2IVg388wTv

— Matthew Luxmoore (@mjluxmoore) December 20, 2021

Diçka e tillë në fakt, është paralajmëruar prej kohësh, duke parë tensionet në rajonin e Donbassit.

Pas aneksimit të rajonit të Krimesë në vitin 2014 me anë të një referendumi, vëmendje ka shkuar për nga Donbassi.

Veçanërisht gjatë muajve të fundit, ka pasur një retorikë shqetësuese mbi rajonin.

Vetë Moska, është e vendosur të mos e tërheqë prezencën e shtuar ushtarake në Donbass. Thirrjet e vendeve anëtarë të NATO-s nga ana tjetër, janë të qarta dhe kërkojnë qetësi e stabilitet.

Këtë nga ana tjetër, Rusia jo vetëm nuk e ofron, por e kundërshton. Gjithë situata bëhet edhe më e qartë, kur propaganda e televizionit rus, shkon deri aty sa të kërkojë luftën.

Bashkimi Evropian në bashkërendim me SHBA-të, kanë paralajmëruar prej kohësh sanksione shtesë. Megjithatë, një hap i tillë ende nuk është marrë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.