Aplikacione

Telashet e Twitter-it në Indi dhe Nigeri


Media sociale, Twitter, është nën rrethim në dy vende që janë kritike për planet e saj të rritjes globale.

Agjencia e lajmeve, CNN, tregon se për muaj me radhë, Twitter-i është futur në një betejë me qeverinë indiane për fjalën e lirë dhe çështje të tjera dhe po lufton me rregulla të reja kufizuese të shtyra nga New Delhi.

Gjithashtu ngjarje edhe më dramatike janë duke u zhvilluar mijëra milje larg përgjatë bregdetit perëndimor të Afrikës.

Javën e kaluar, Nigeria bllokoi Twitter-in “për një kohë të pacaktuar” pasi kompania fshiu një postim nga presidenti Muhammadu Buhari që kërcënonte një goditje brutale të trazirave në kombin më të populluar të Afrikës. Mirëpo, qeveria nigeriane urdhëroi edhe prokurorët federalë të arrestojnë përdoruesit e aplikacionit.

Por, kufizimet në Indi dhe ndalimi në Nigeri janë shqetësuese për platformën. Teksa kompania nuk zbërthen të dhënat e përdoruesve për këto vende, hulumtimet e pavarura sugjerojnë që India është ndër pesë tregjet e saj më të mira.

Edhe ekonomia e tretë më e madhe e Azisë është tregu kryesor i rritjes së Twitter-it. Ndërkohë, sipas Sondazheve të NOI-t, gati 20 për qind e popullsisë prej 200 milionësh të Nigerisë kanë llogari në Twitter.

CNN shkruan se tanimë që Nigeria ka treguar se nuk ka frikë të ndalojë platformën, disa shqetësohen se nëse mosmarrëveshja midis New Delhi-t dhe kompanisë nuk mund të zgjidhet, India mund të jetë e ardhmja.

“Nëse kjo vazhdon, zilia e qeverisë indiane të Kinës do të bëhet zili e Nigerisë”, ka shkruar aktivisti i internetit në Twitter, Nikhil Pahwa.

Ai ka shtuar se “mund të shihni më shumë thirrje për ndalimin e Twitter-it në Indi, nëse ajo vazhdon të sfidojë qeverinë”.

Ndërkohë, reagimi i Twitter-it ndaj presionit politik në këto vende do të vendosë trajektoren e saj në ekonomitë me rritje të shpejtë, të cilat janë kritike për çdo strategji globale të zgjerimit. Madje, tejkalimi me sukses i tensioneve mund t’u japë firmave të tjera të teknologjisë amerikane një hartë për trajtimin e qeverive që kanë tendenca gjithnjë e më autoritare.

Nga ana tjetër, këto sfida të reja jashtë vendit përkojnë me tensionet në brenda vendit, ku Washington-i ka treguar një gatishmëri për të frenuar kompanitë amerikane të teknologjisë.

‘Po minon’ Nigerinë

Në Nigeri dhe Indi, muajt ​​e tensioneve kanë çuar në problemet e Twitter-it.

Në fillim të këtij viti, kur kompania vendosi të vendoste bazën e saj të parë në Ghana, Afrikë, në vend të ekonomisë më të madhe të kontinentit, nigerianët u ndjenë të zhgënjyer.

Edhe pse thuajse 40 milionë nigerianë kanë një llogari në Twitter, ka disa konsiderata gjeopolitike që mund të kenë ndikuar në vendimin e kompanisë.

Kur Twitter-i e njoftoi vendimin në muajin prill, ai e përshkroi Ghana-n “si një kampion për demokracinë, një mbështetës të fjalës së lirë, lirisë në internet dhe Internetit të Hapur”.

Gjatë këtij muaji, tensionet u përshkallëzuan kur kompania fshiu postimin nga Buhari për shkeljen e politikave të tij mbi sjelljen abuzive.

CNN tregon se vendi e kundërshtoi vendimin e Twitter-it duke ndaluar platformën për lejimin e përdorimit të “aktiviteteve që janë të afta të minojnë ekzistencën e korporatave të Nigerisë”, sipas Ministrisë së Informacionit dhe Kulturës së Nigerisë.

Ndërkohë, kompania ka thënë se “do të punojë për të rivendosur hyrjen për të gjithë ata në Nigeri që mbështeten në Twitter për të komunikuar dhe për t’u lidhur me botën”.

“Ndalimi i Nigerisë patjetër do të bëjë që shumë ekonomi të tjera në zhvillim të mendojnë se si të marrin gjithashtu vëmendjen e platformave,”, ka thënë Gbenga Sesan, drejtor ekzekutiv i Paradigm Iniciativa, e cila punon për përfshirjen digjitale dhe të drejtat në Afrikë.

Ai ka shtuar se nëse Twitter-i përmbush kërkesat e reja të regjistrimit të Nigerisë, “atëherë vendet e tilla mund të provojnë të njëjtën qasje në mënyrë që të marrin të ardhura nga taksat”.

Kërcënimet për fjalën e lirë në Indi

Tensionet në Indi u ndezën në muajin shkurt teksa protestuesit përdorën Twitter-in për të shprehur mendimet e tyre kundër ligjeve të reja të kryeministrit Narendra Modi për bujqësinë.

Twitter-u u përplas me qeverinë për një urdhër për të hequr llogari sipas urdhrit të Ministrisë së IT-së, duke e përmbushur pjesërisht, por duke refuzuar të ndërmarrë veprime kundër gazetarëve, aktivistëve ose politikanëve.

Në muajin maj, policia u paraqit në zyrën e Twitter-it në New Delhi pasi kompania vendosi të etiketonte një tweet nga një zëdhënës i partisë qeverisëse të Modi-t, Bharatiya Janata, si “media të manipuluara”.

Policia deklaroi se vizita ishte “pjesë e një procesi rutinë” për të bërë që Twitter-i të bashkëpunonte me hetimin. Por, kompania ‘shpërtheu’ duke e konsideruar masën si “taktika frikësimi” dhe tha se ishte “e shqetësuar” për sigurinë e punonjësve të saj në vend.

CNN thekson se rregullat e reja të Indisë për mediat sociale vetëm sa e kanë intensifikuar ftohtësinë.

Në to përfshihen kërkesa që kompanitë të krijojnë role të veçanta në Indi për t’i mbajtur ato në përputhje me ligjin vendas dhe që firmat të qëndrojnë në kontakt me zbatimin e ligjit.

Gjithashtu ka kërkesa që shërbimet të heqin disa lloje të përmbajtjes, duke përfshirë postimet që shfaqin “lakuriqësi të plotë ose të pjesshme”.

Lidhur me “elementët thelbësorë të rregullave të reja të IT-së” dhe “kërcënimin e mundshëm të lirisë së fjalës” në vend, kompania ka shprehur shqetësime. Por, qeveria e Modi-t ka pohuar se kompania po përpiqet të “dëmtojë sistemin ligjor të Indisë” nga “kundërshtimi i saj i qëllimshëm” i rregullave.

“Twitter-i duhet të veprojë në përputhje me ligjet e vendit”, ka thënë qeveria në një deklaratë në muajin maj duke shtuar se “bërja e ligjit dhe formulimet e politikave janë e drejta e vetme e sovranit dhe Twitter-i është vetëm një platformë e mediave sociale dhe nuk ka asnjë vend në diktimin e asaj që duhet të jetë korniza e politikës ligjore të Indisë”.

Debati rreth përdorimit të mediave sociale në vend, për shumë njerëz nuk ka të bëjë shumë me lirinë e fjalës, por më tepër me një kompani të huaj që sfidon fuqinë e qeverisë indiane, ka thënë Pahwa duke shtuar se ndalimi në Nigeri “i hedh benzinë zjarrit”.

Punëso në vend, rritu në vend

Sipas ekspertëve, në mënyrë që kompani si Twitter-i të mbijetojnë dhe të lulëzojnë në këto ekonomi në zhvillim, mund të duhet të investojnë më shumë në ekipe lokale dhe të kuptojnë ligjet lokale.

Tanimë edhe presioni i qeverisë mund të dobësojë vendosmërinë e Twitter-it.

Gjatë muajit të kaluar, pasi sinjalizoi rezervat e saj me rregullat e reja të mediave sociale, kompania ka thënë se mbetet “thellësisht e përkushtuar” ndaj Indisë, e cila është ndër tregjet e saj më të mëdha në botë.

“Ne kemi siguruar qeverinë e Indisë se Twitter-i është duke bërë çdo përpjekje për t’iu përmbajtur udhëzimeve të reja dhe një përmbledhje e përparimit tonë është ndarë siç duhet”, ka pohuar kompania në një deklaratë gjatë kësaj javë. “Ne do të vazhdojmë dialogun tonë konstruktiv me qeverinë indiane”, ka shtuar ajo.

Për Vivan Sharan, partner në firmën e konsulencës së politikave teknike me bazë në Delhi Koan Advisory Group, mbyllja e Nigerisë dhe debati në Indi mund të jetë një “thirrje zgjimi” për kompanitë perëndimore të mediave sociale. Kjo për “të rritur kapacitetin lokal në përmbajtje të moderuar dhe vendimmarrja në zyrat e vendit”.

“Ky është sigurisht një urdhër i gjatë për kompanitë e moshës së re që janë mësuar në shkallë dhe prani globale, pa investime të mëdha në terren”, është shprehur ai.

“Shumica e drejtuesve të mediave sociale shpenzojnë pjesën më të madhe të gjerësisë së tyre operacionale në tregjet e zhvilluara. Kjo paradigmë është e paqëndrueshme dhe tani ka filluar të zhvendoset”, ka shtuar ai.

/Albanianpost.com


Lajmet kryesore