Tanket e para Abrams mbërrijnë në Ukrainë, thonë zyrtarët amerikanë

Tanket e para Abrams të prodhuara nga Amerika janë dorëzuar në Ukrainë, thanë dy zyrtarë të mbrojtjes amerikane, duke mbërritur disa muaj përpara vlerësimeve fillestare dhe në kohë për t’u përdorur në kundërsulmin e Kievit kundër forcave ruse.

Lajmi u bë i ditur nga e përditshmja amerikane “The New York Times”.

Më shumë tanke M1 Abrams do të dërgohen në muajt e ardhshëm, thanë zyrtarët, duke vënë në dukje se ato që u dërguan në Ukrainë të shtunën përfaqësonin të parin nga 31 që administrata Biden ka premtuar të dërgojë.

Zyrtarët nuk thonë se sa janë dorëzuar deri më tani.

Abrams do të jetë ndër tanket e tjera në arsenalin e Ukrainës që mund t’i përdorë për të shtyrë, dhe ndoshta për të rimarrë territorin e mbajtur nga Rusia në rajonet lindore dhe jugore të Ukrainës, ku luftimet janë zhvilluar për muaj të tërë pa përparime të mëdha.

Por Kyrylo Budanov, kreu i inteligjencës ushtarake të Ukrainës, ka paralajmëruar se Abrams do të duhet të vendoset “në një mënyrë shumë të përshtatur, për operacione shumë specifike, të hartuara mirë”, ose rrezikon të shkatërrohet.

Dy zyrtarët amerikanë folën në kushte anonimiteti sepse dërgesat nuk ishin njoftuar zyrtarisht.

Si Presidenti Biden ashtu edhe sekretari amerikan i mbrojtjes, Lloyd J. Austin III, kishin parashikuar javën e kaluar se tanket do të dërgoheshin brenda disa ditësh.

Ardhja e tyre përfaqëson një pjesë të një përpjekjeje të jashtëzakonshme nga aleatët perëndimorë – duke iu përgjigjur shtytjes së pamëshirshme nga Ukraina – për të ofruar një armë të fuqishme muaj përpara afatit.

Vetëm një vit më parë, aleatët i kishin rezistuar dërgimit të tankeve të prodhimit perëndimor në Ukrainë, të shqetësuar se një gjë e tillë do të tërhiqte NATO-n më drejtpërdrejt në luftë dhe do të përshkallëzonte më tej tensionet me presidentin rus Vladimir Putin.

Megjithatë, deri në janar, të bindur se Ukrainës i duheshin më shumë mjete të blinduara të rënda për t’u përballur me forcat ruse, Britania, Gjermania dhe Shtetet e Bashkuara ranë dakord secila të furnizonte tanket moderne perëndimore ose të lejonte transferimin e tyre në Kiev.

Në atë pikë, ekspertët parashikuan se mund të duhej të paktën një vit për të trajnuar mjaftueshëm forca ukrainase mbi armët e sofistikuara perëndimore.

Trupat amerikane filluan trajnimin e forcave ukrainase në fund të pranverës, duke kryer një kurs të shkurtuar 12-javor për të operuar tanket Abrams në bazat ushtarake amerikane në Gjermani.

Vendimi amerikan për të dhuruar tanket Abrams zhbllokoi transferimin nga vendet evropiane të disa dhjetëra tankeve Leopard të prodhimit gjerman, një tjetër armë e sofistikuar perëndimore, të cilën Berlini nuk kishte qenë i gatshëm ta lejonte pa një angazhim të ngjashëm nga Shtetet e Bashkuara.

Britania dorëzoi të paktën 14 nga tanket e saj Challenger 2 në pranverë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.