Ministri i Punëve të Jashtme të Serbisë, Ivica Daçiç, është takuar këtë të enjte në Moskë me Ministrin e Punëve të Jashtme të Federatës Ruse, Sergei Lavrov, me të cilin ka biseduar edhe për situatën në Kosovë.
Daçiç është duke qëndruar në Moskë me ftesë të homologut të tij rus Lavrov, derisa është bërë me dije se të njëjtit do të marrin pjesë edhe në ndeshjen miqësore të futbollit ndërmjet Rusisë dhe Serbisë, e cila fillon në orën 20:00 në orën lokale atje.
Si bashkëkryetar i Komitetit Ndërqeveritar për Bashkëpunim Tregtar, Ekonomik dhe Shkencor-Teknik në Serbi, Daçiç do të takohet edhe me Ministrin e Zhvillimit Ekonomik të Federatës Ruse dhe bashkëkryetarin e pjesës ruse të Komitetit Ndërqeveritar Maksim Reshtnikov.
Siç ishte paralajmëruar edhe më herët nga Ministria e Punëve të Jashtme të Rusisë, Daçiç dhe Lavrov do të diskutojnë një gamë të gjerë çështjesh të bashkëpunimit politik dhe ekonomik ruso-serb, do të shkëmbejnë mendime për situatën në Kosovë dhe në tërë rajonin e Ballkanit, si dhe do të diskutojnë problemet aktuale ndërkombëtare.
Daçiç është nga kryediplomatët e rrallë evropianë që takohet dhe shkon për vizitë në Rusi, pas agresionit rus në Ukrainë.
Përveç kësaj, Serbia po ashtu është vendi i vetëm – së bashku me Bosnje e Hercegovinën, për shkak të Republikës Srpska, entiteti serb – që nuk i kanë vënë sanksione Moskës zyrtare, duke u mos u rreshtuar kështu me vendet perëndimore.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
