Takimi “ndryshe” në Bruksel shpërfaqi politikën “amatore” të Kosovës

Për herë të parë një takim mes dy niveleve krejtësisht të ndryshme mes Kosovës dhe Serbisë, u mbajt të enjten e 27 shkurtit në Bruksel.

Takimi u zhvillua mes guvernatorit të Bankës Qendrore të Kosovës (BQK), Ahmet Ismajli dhe drejtorit të ashtuquajturës Zyrë për Kosovën në Qeverinë e Serbisë, Petar Petkoviç.

Fillimisht në takime të ndara e pastaj në takim trilateral nën ndërmjetësimin e Emisarit Special të Bashkimit Evropian (BE) për dialogun Prishtinë-Beograd, Mirosllav Lajçak, u kërkua një zgjidhje dhe shqyrtim për çështjen e ndalimit të dinarit në Kosovë – i cili po përdorej deri tani për pagesën e shërbimeve të ndryshme në Veri të Kosovës.

Por, sërish diskutimet mes palëve s’dërguan në rezultat.

“E çuditshme” – pjesëmarrja e guvernatorit të BQK-së në takimin e Brukselit

Nënkryetari i Lidhjes Demokratike të Kosovës (LDK), Lutfi Haziri, e konsideron si “tejet të çuditshme”, pjesëmarrjen e guvernatorit të BQK-së, Ahmet Ismajli, në këtë takim të mbajtur në Bruksel.

Ai gjatë bisedës për Albanian Post thekson se kjo ishte hera e parë që dy nivele të ndryshme mbajtën takime të nivelit të lartë.

“Takime në mes të këtij niveli në dialog s’ka pasur asnjëherë në Bruksel. Që nga viti 2012, është konfirmuar dhe miratuar rregullorja mbi qarkullimin e euros, por kjo çështje u bë për herë të parë nga kjo Qeveri”.

Përmes këtij veprimi sipas tij pushteti tregoi se ka dështuar në dialog.

“Është dështim i procesit të dialogut nga ana e Kosovës, me vetë faktin që është paraqitur në agjendë ndërkombëtare një çështje që është e brendshme dhe e mbyllur, tregon se ka dështim në zgjedhjen e çështjeve të brendshme”.

Haziri e kritikon edhe BQK-në që i dërgoi letër autoritetit bankar të Serbisë, duke thënë se kjo është bërë pa konsultim.

“Përtej kësaj, shkon lajmi i keq se BQK-ja i ka shkruar letër autoritetit bankar të Serbisë, drejtpërdrejt pa ndërmjetësim dhe pa u konsultuar me organet e shtetit”.

Ndërrimi i deklaratave nga pushteti për këtë situatë nga këndvështrimi i Hazirit, tregon për qëllime të tjera të Qeverisë së Kosovës.

“Me vetë faktin që është thënë se s’do të ketë takime për dinarin, e po ndodh takimi për dinarin tregon se është mashtrim publik. Në të kundërtën çështjet në Bruksel, s’janë teknike, por janë politike”.

Prezenca e BQK-së, sqaron Haziri se do të arsyetohej vetëm nëse do të merrte pjesë ndonjë negociator tjetër nga Kosova.

“Nëse është dashur të jetë dikush nga Banka Qendrore e Kosovës (BQK), qoftë nga bordi apo qoftë nga drejtori atëherë është dashur të jetë në mbështetje të negociatorit e jo pa negociator”.

“Amatore” – sjellja e pushtetit

Dërgimin e BQK-së, në këtë takim e konsideron si vendim të gabuar dhe jo të duhur edhe analisti politik, Dritëro Arifi.

“Institucionet e Kosovës, u treguan amatorë në çështjen e takimit mes Bankës Qendrore të Kosovës (BQK) dhe Bashkimit Evropian (BE). Natyrisht që në të kaluarën ka pasur takime të nivelit teknik, por kjo besoj që është dashur të tejkalojë nivelin teknik, është dashur që të flitet vetëm për çështje politike”.

“Paaftësia e Qeverisë që ta menaxhojë situatën e ka dërguar vendin në një pozitë shumë të vështirë, pra mund të themi se ka qenë e panevojshme të dërgohet BQK-ja në Bruksel si pjesë e dialogut”,  thotë Arifi në një përgjigje me shkrim për Albanian Post.

Mirëpo, ai shton se kjo ka gjasë që të jetë edhe përgjigje nga bota perëndimore ndaj Kosovës për shkak të mos koordinimit.

“Kjo është një hakmarrje e botës perëndimore ndaj Kosovës, për shkak të veprimeve të pakoordinuara që politikën monetare ta vendos në agjendën e dialogut në Bruksel, çdo thirrje nga Brukseli shndërrohet si pjesë e dialogut me dëshirë apo pa dëshirën e Kosovës”.

Në mungesë të përgjigjeve pozitive nga ky takim, Arifi pohon se do të fajësohet Banka Qendrore e Kosovës (BQK).

“Çdo gjë që mund të shkoj keq, mund t’i atribuohet kinse e ka bërë Banka Qendrore të Kosovës (BQK), por në fakt pa vendime politike nuk bëhet asgjë në asnjë vend të botës. Ka qenë e panevojshme që të shkohet deri në këtë pikë, pasi këto çështje është dashur të diskutohen vetëm brenda Kosovës në koordinim me partnerët ndërkombëtarë”.

Çka u tha pas takimit në Bruksel?

I pari që u deklarua pas takimit të mbajtur në Bruksel ishte shefi i të ashtuquajturës “Zyrë për Kosovë” në Qeverinë e Serbisë, njëherësh kryenegociator i palës serbe në dialogun për normalizimin e raporteve Kosovë-Serbi, Petar Petkoviç, i cili insistoi që diskutimet për këtë çështje të bëhen në nivel politik, derisa akuzoi palën kosovare për dëbim të serbëve nga Kosova.

Në një prononcim për gazetarë pas takimeve që u zhvilluan të martën e 27 shkurtit nën ndërmjetësimin e Emisarit Special të BE-së për dialogun Prishtinë-Beograd, Mirosllav Lajçak, kryenegociatori serb e cilësoi ndalimin e dinarit për transaksione me para të gatshme “vendim politik” të Kosovës, qëllimi i së cilës është “dëbimi i serbëve” nga territori kosovar.

Pas Petkoviç-it u deklarua edhe guvernatori i BQK-së, Ahmet Ismaili i cili tha se gjatë takimit janë diskutuar modalitetet teknike se si mundet të vazhdojë financimi nga Serbia, përmes kanaleve ligjore dhe transparente në llogari bankare të përfituesve në euro, bazuar në propozim e BQK-së dërguar te Banka Popullore e Serbisë, dhe asgjë tjetër.

“Nuk ka asgjë tjetër dhe as nuk kemi pranuar diskutime tjera”, ka thënë Ismajli.

Ai ka potencuar se rregullorja e BQK-së është në fuqi dhe e njëjta nuk do të ndryshojë.

Ndërsa, emisari Special i Bashkimit Evropian (BE) për dialogun ndërmjet Kosovës dhe Serbisë, Mirosllav Lajçak, nëpërmjet një postimi në platformën “X” pas takimeve të së martës në Bruksel të Belgjikës për dinarin, tha se “shumë pyetje mbeten pa përgjigje” dhe sëkëndejmi, nevojiten takime shtesë për këtë çështje në të ardhmen.

Ky takim u fokusua në rregulloren e re të Bankës Qendrore të Kosovës (BQK), nëpërmjet së cilës synohet të ndalohet dinari serb në territorin kosovar.

Kosova refuzoi që në takimet e thirrura nga BE-ja për dinarin të përfaqësohet në nivel politik sepse konsideron që çështja e rregullores së BQK-së mbi operacionet me para të gatshme nuk duhet të jetë temë në procesin e dialogut për normalizimin e marrëdhënieve midis Kosovës dhe Serbisë.

Më 1 shkurt hyri në fuqi rregullorja e BQK-sё, nëpërmjet së cilës përcaktohet euro si e vetmja valutë ligjore që lejohet për transaksione me para të gatshme në Kosovë, duke ndaluar përdorimin e dinarit serb brenda territorit. Në zonat e banuara me shumicë serbe në vend, përveç valutës euro, deri tani është përdorur edhe dinari nën sistemin paralel të financuar nga Serbia.

“Unë mirëpres angazhimin e palëve për të gjetur një zgjidhje të qëndrueshme për komunitetet e prekura nga rregullorja e fundit e BQK-së. Takimi i sotëm i dialogut ishte një hap i parë i rëndësishëm, por shumë pyetje politike mbeten pa përgjigje. Do të nevojiten takime shtesë”, shkroi Lajçaku menjëherë pas përfundimit të takimeve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.