“Takimet i ka pasur produktive dhe përmbajtjesore” – në Vetëvendosje janë të kënaqur me ekskursionin e Kurtit në SHBA

Anëtari i kryesisë së Kuvendit të Kosovës nga radhët e Lëvizjes Vetëvendosje, Adnan Rrustemi, ka përsëritur përgjithësimet e kryeministrit, Albin Kurti, kur është pyetur për mungesën e takimeve të profilit të lartë të kryeministrit në vizitën e tij të gjatë në Shtetet e Bashkuara të Amerikës.

I pyetur nga gazetarët pas mbledhjes së kryesisë së Kuvendit, Rrustemi pohoi se “kjo vizitë ka qenë produktive edhe në përmbajte edhe në takime”, duke mos shpalosur se cili takim ishte produktiv.

Ka thënë edhe se qëllimet e vizitës ishin dy: për investime dhe siguri, por nga takimet e veçanta që ka pasur Kurti nuk ka mundur të tregojë se cili takim rezultoi me një investim konkret në Kosovës, ose të paktën një premtim për shqyrtim të investimit potencial.

“Vizita ka pasur dy tema boshte: investime dhe siguria”, deklaroi ai.

“Ka pasur takime me këshilltarin e lartë të Joe Biden për çështje të sigurisë, Jake Sullivan, por edhe takime të tjera me zyrtarë nga Departamenti i Shtetit Amerikan”, pohoi ai.

Rrustemi nuk ka mundur të jap një përgjigje të prerë, as kur është pyetur për raportimin e Kurtit para deputetëve për vizitën e tij në SHBA.

Ai i është referua të kaluarës, duke pohuar se kjo për Kurtin nuk është problem, meqë e ka bërë edhe më herët.

“Kryeministri jo vetëm që ka raportuar, por edhe ka diskutuar, para dhe pas takimeve që ka pasur”, deklaroi Rrustemi duke iu referuar takimeve që Kurti ka zhvilluar në kuadër të dialogut në Bruksel.

“Kryeministri do të raportojë sa herë që do të ftohet, pasi Kurti ka dëshmuar që ka raportuar edhe pas edhe para takimeve”.

Rrustemi ka folur edhe për mbledhjen e kryesisë së Kuvendit, ku është diskutuar edhe nisma e opozitës për tërheqjen e Trustit nga qytetarët.

Ka deklaruar se përgjigja e Vetëvendosjes për këtë çështje mbetet e njëjtë. Ata janë kundër dhe, siç pohoi Rrustemi, tashmë i kanë bërë të ditura arsyet e këtij kundërshtimi.

Se cili do të jetë qëndrimi i deputetëve të VV-së në seancën potenciale ku do të votohej për Trustin, nuk ka treguar. Porse, ka deklaruar se “ne keni dhënë përgjigje dhe nuk ka asnjë ndryshim”.

Përgjigja e Vetëvendosjes dhe e Qeverisë që udhëhiqet nga kjo parti, ka qenë se nuk është politikë e duhur, madje është e dëmshme, që sa herë ka kriza ekonomike, qytetarëve t’u lirohen kontributet e tyre nga Trusti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.