“Tagesanzeiger”: Posti i Lajçakut në Zvicër, kthim prapa në karrierë – afërsia me mikun e Putinit, aktualisht e pafavorshme

Në një artikull të gazetës zvicerane “Tagesanzeiger” mbi rotacionin e madh në postet diplomatike të Bashkimit Evropian (BE) nëpër vende të ndryshme, ku pritet që i dërguari i posaçëm i bllokut për dialogun Kosovë-Serbi, Mirosllav Lajçak, të bëhet ambasador i BE-së në Zvicër, vlerësohet se kalimi në Bernë paraqet rënie drastike në karrierë për diplomatin sllovak.

Lajçaku pritet të marrë “post të ri” në shtator, ndërsa blloku përgatit poste të reja diplomatike në prag të zgjedhjeve evropiane – në artikullin e gazetës zvicerane potencohet se diplomati sllovak arriti t’ia patentojë vetes një “post të sigurt” para ciklit të ri elektoral për ulëset e Parlamentit Evropian (PE) në qershor nga i cili varet përbërja e Komisionit Evropian (KE).

Gjithashtu, një aspekt negativ që veçohet nga gazeta zvicerane, posaçërisht sa i përket trashëgimisë kontraverse të Lajçakut në diplomaci, konsiderohet të jetë edhe afërsia e diplomatit sllovak me kryeministrin e majtë nacionalist të Sllovakisë, Robert Fico, i cili mbetet një ndër aleatët e paktë të presidentit rus, Vladimir Putin, pavarësisht agresionit të Rusisë në Ukrainë.

Ish-ministri i Punëve të Jashtme të Sllovakisë u emërua në postin e Emisarit Special të BE-së për dialogun Prishtinë – Beograd para katër vjetësh. Megjithatë, gazeta zvicerane fajëson diplomatin sllovak që prej marrjes së detyrës në vitin 2020 s’e arriti asnjë rezultat pozitiv në dialog. Madje, gazeta zvicerano konstatoi se tensionet Kosovë-Serbi vetëm sa janë përkeqësuar.

Lajçaku për një kohë të gjatë është kritikuar për “qasje të pabalancuar” në procesin e dialogut dhe jo vetëm nga institucionet kosovare, por edhe nga diplomatë perëndimorë. Në artikullin e gazetës zvicerane përmendet një ndër kritikat kryesore ndaj sllovakut – ai vjen nga një prej pesë shteteve anëtare të BE-së që ende nuk e kanë njohur pavarësinë e Kosovës.

Largimi i Lajçakut – “shans i ri” për Kosovën: Çfarë do të sjellë rotacioni në BE?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.